Fýtbol: Qazaqstannyń áıelder quramasy Izraıl jáne Shveıtsarııa quramalarymen oınaıdy
ASTANA. Maýsymnyń 16-sy. QazAqparat /Ernur Aqanbaı/ - Fýtboldan Qazaqstannyń áıelder quramasy 2011 jylǵy álem chempıonatynyń irikteý týrnıri aıasynda maýsymnyń 19-y kúni Izraıl jáne maýsymnyń 23-i kúni Shveıtsarııa quramalarymen bolatyn oıyndarǵa daıyndyǵyn jalǵastyrýda. Bizdiń komanda atalmysh kezdesýlerdi óz alańynda ótkizedi. Aıta keteıik, jerlesterimiz jaýapty matchtar aldyndaǵy daıyndyqty maýsymnyń 8-i kúni Shymkentte bastaǵan bolatyn.
Álem chempıonatynyń irikteý týrnıri aıasynda jerlesterimiz Reseı, Irlandııa, Shveıtsarııa jáne Izraıl quramalarymen birge 6-shy topta óner kórsetýde. Bizdiń komanda buǵan deıin irikteý týrnıri aıasynda 4 kezdesý ótkizip, sonyń barlyǵynda jeńilip qaldy. Olar birinshi oıynyn 2009 jylǵy qyrkúıektiń 24-de syrt alańda Irlandııa quramasymen ótkizip, 1:2 esebimen utyldy. Al, qazannyń 24-de ótken ekinshi kezdesýinde syrt alańda Izraılge 1:0 esebimen jol berdi. Qazannyń 29-da bolǵan úshinshi oıynynda óz alańynda Irlandııany qabyldap, taǵy da 1:2 esebimen utylyp qaldy. Al, óz alańynda 2010 jylǵy naýryzdyń 28-de ótken tórtinshi kezdesýde Reseıden 0:6 esebimen oısyraı utyldy. Sóıtip, 4 oıynda áli birde-bir upaı jınamaǵan bizdiń komanda óz tobynda sońǵy orynda keledi.
Aıta keteıik, komandanyń súreńsiz oıynyna serpin berý úshin sáýir aıynda Fýtboldan Qazaqstan áıelder quramasynyń jańa bas jattyqtyrýshysy bolyp moldovalyq maman Evgenıı Pýsıkov taǵaıyndalǵan bolatyn. Endi jerlesterimiz E. Pýsıkovtyń jetekshiligimen Izraıl jáne Shveıtsarııa quramalaryna qarsy oınaıtyn bolady.
