Fýtbol: Qazaqstandyq Zaınýtdınov «Spartak» - TsSKA matchynda tamasha gol soqty
NUR-SULTAN. QazAqparat – Fýtboldan Reseı chempıonatynyń 19-týrynda Qazaqstan ulttyq quramasynyń oıynshysy Baktıer Zaınýtdınov TsSKA sapynda gol soǵyp, erekshe kózge tústi, dep habarlaıdy QazAqparat tilshisi.
Máskeýlik «Spartak» pen TsSKA matchynda qazaqstandyq fýtbolshy áýeli qosalqy quramda boldy. Bıyl qysqy úzilisten keıin qaıta jalǵasqan Reseı birinshiliginde oınaıtyn qos komandada biraz ózgerister boldy.
«Spartak» tizginin ıtalııalyq maman Paolo Vanolı ustasa, TsSKA komandasyna jańadan oıynshylar keldi.
Ekinshi taımda 49-mınýtta sol jańadan qosylǵandardyń biri, túrkııalyq ıÝsýf ıAzydjı aıyp dobyn keremet oryndap, TsSKA-ny alǵa shyǵardy. Al 56-mınýtta B.Zaınýtdınov taǵy bir jańadan kelgen fýtbolshy, paragvaılyq Hesýs Medınanyń ornyna shyqty. 79-mınýtta Ivan Oblıakovtan ádemi pas alǵan Baktıer tamasha soqqymen esepti eseledi – 2:0. Oǵan qosa oıyn sońynda qazaqstandyq fýtbolshyny shalyp jyqqan «Spartak» quramyndaǵy nıgerııalyq jartylaı qorǵaýshy Vıktor Mozes eskertý qaǵazyn alyp tyndy.
Osylaısha B.Zaınýtdınov TsSKA komandasynyń derbıde jeńiske jetýine óz úlesin qosty. Máskeýlik klýb týrnır kestesinde tórtinshi orynda keledi.
