Fýtbol: Qazaqstandyq úsh qyz Madrıdte sheberligin shyńdaıdy
NUR-SULTAN. QazAqparat - «Astana» fýtbol klýby Ispanııadaǵy «Dostyqqa arnalǵan fýtbol» baǵdarlamasyna qatysyp, klýbqa qarasty fýtbol ortalyǵynan úsh qyz balany Ispanııaǵa jiberip otyr, dep habarlaıdy QazAqparat tilshisi.
Astana-Arenada ótken búgingi baspasóz máslıhatynda bul týraly klýbtyń atqarýshy dırektory Pol Eshýort málim etti.
«Ózderińiz estip otyrǵandaı, «Astana» fýtbol klýby halyqaralyq «Dostyqqa arnalǵan fýtbol» áleýmettik baǵdarlamasyna qatysady. Ol baǵdarlama boıynsha Ispanııada álemniń ár túkpirinen jas qatysýshylar bas qosady. «Astana» FK úshin osyndaı halyqaralyq baǵdarlamalarǵa qatysýdyń mańyzy zor. Uıymdastyrýshylar tarapynan shaqyrtýdy qýana qabyl alyp otyrmyz», - deıdi ol.
Pol Eshýorttyń aıtýynsha, qazirgi tańda elordadaǵy «Astana» FK ortalyǵynda 300-ge tarta jas óren fýtbol úıirmesine qatysady. Osy jyly tipti 2003-2008 jyldary týǵan qyz balalarǵa arnalǵan top ashylǵan.
«Bizdiń áriptesimiz - «Samuryq-Qazyna» Ulttyq ál-aýqat qory» AQ-tyń arqasynda fýtbol ortalyǵyndaǵy barlyq úıirmelerdi tegin etýdi josparlap otyrmyz. Osylaısha, biz jas býyndy baýlýda óz úlesimizdi qosýdamyz», - deıdi Pol Eshýort.
«Dostyqqa arnalǵan fýtbol» baǵdarlamasy boıynsha qazaqstandyq úsh qyz bala men bir jas bapker (Darııa Ahmetqalıeva, Adelııa Bekqojına, Darııa Erjan men Sergeı Esko) Ispanııaǵa baryp, fýtboldyń qyr-syryn meńgeretin bolady.
«Delegatsııa basshysy - aǵylshyn tilin biletin jas maman Erbol Musabaev. Baǵdarlama erejelerine saı, oǵan 12 jastaǵy sportshylar qatysýy kerek. Jan-jaqty taldaý jumystaryn júrgize otyryp, Ispanııaǵa bizdiń fýtbol ortalyǵyndaǵy úsh qyz balany jiberýdi uıǵaryp otyrmyz. Іrikteý barynsha ashyq júrgizildi. Madrıdte álemniń túkpir-túkpirinen balalar jınalatyndyqtan, úsh qyzdyń aǵylshyn tilin bilýine basa mańyz berdik», - deıdi ol.
Aıta keterligi, «Astana» fýtbol klýby mundaı halyqaralyq deńgeıdegi aýqymdy baǵdarlamaǵa tuńǵysh ret qatysyp otyr. Baǵdarlamanyń fınaldyq kezeńi 28 mamyr men 2 maýsym aralyǵynda ótedi. Fýtboldyń qyr-syryn meńgerýmen birge Madrıdke attanǵan balalar Chempıondar lıgasynyń fınalyn tamashalaý múmkindigine ıe bolady.
