Fýtbol: Qazaqstandyq oıynshy Reseı chempıonatynda erekshe kózge tústi
NUR-SULTAN. QazAqparat – Fýtboldan Reseı chempıonatynyń tórtinshi týrynda «Ýfa» komandasy óz alańynda Dondaǵy Rostovtyń «Rostovyn» qabyldady, dep habarlaıdy QazAqparat tilshisi.
«Rostov» sapynda Qazaqstan ulttyq quramasynyń múshesi, jartylaı qorǵaýshy Baktıer Zaınýtdınov alańǵa shyǵyp, óz komandasynyń jeńiske jetýine súbeli úlesin qosty.
Osyǵan deıin úsh oıynda nebári úsh upaı jınaǵan, belgili reseılik fýtbolshy ári maman Valerıı Karpın jattyqtyratyn «Rostovtyń» jańa maýsymdaǵy qarqyny onsha emes-ti. Al ýfalyqtar 4 upaımen sál alda turǵan.
Matchtyń 39-mınýtynda óreskel tártip buzǵan «Ýfanyń» jartylaı qorǵaýshysy Vıacheslav Krotov alańnan qýylyp, komandasyn qıyn jaǵdaıda qaldyrdy.
Kóp uzamaı B.Zaınýtdınov qaqpa buryshyn dál kózdegenimen, ýfalyq qorǵaýshy Alekseı Nıkıtın komandasyn goldan aman alyp qaldy. Budan keıin qaqpashy Aleksandr Belenov ózbekstandyq Eldor Shomýrodovtyń gol soǵýyna múmkindik bergen joq.
Match taǵdyry ekinshi taımda sheshildi. 79-mınýtta sol qaptaldan sýyrylyp shyqqan B.Zaınýtdınovtyń qaqpaǵa qaraı bergen dobyn komandaǵa jańa maýsymda kelgen japonııalyq Kento Hashımoto baspen dál túsirdi. Osylaısha Baktıer nátıjeli pas avtory atandy.
Rostovtyqtar 1:0 esebimen jeńiske jetip, týrnır kestesinde 8-orynǵa kóterildi. 26 tamyzda ótetin besinshi týrda «Rostov» óz alańynda «Ýral» (Ekaterınbýrg) komandasyn qabyldaıdy.
Eske sala keteıik, budan buryn Qazaqstan quramasy fýtbolshysynyń Máskeýdiń TsSKA-syna aýysýy múmkin ekendigin jazǵan bolatynbyz.
