Fýtbol: Qazaqstandyq qyzdar klýby Chempıondar lıgasynyń 1/8 fınalyna ótti
NUR-SULTAN. QazAqparat – Fýtboldan shymkenttik «BIIK-Qazyǵurt» klýby áıelder Chempıondar lıgasynyń 1/8 fınalyna ótti, dep habarlaıdy QazAqparat tilshisi.
Qazaqstandyq klýb lıganyń 1/16 fınalynyń qarymta kezdesýin Harkovtyń «Jılstroı-2» komandasymen Shymkentte ótkizdi.
Harkovta ótken birinshi oıynda ýkraınalyq qyzdar 2:1 esebimen basym túsken bolatyn. Qazaqstandyqtarǵa qarymta qaıtaryp, kelesi kezeńge ótý úshin keminde bir gol soǵyp, óz qaqpasyn aman alyp qalý kerek edi.
Búgingi básekede 35-mınýtta «BIIK-Qazyǵurt» komandasynyń kapıtany Kámıla Qulmaǵambetova soqqan dop shymkenttik qyzdarǵa jeńis áperdi – 1:0.
Osylaısha qazaqstandyq klýb syrt alańda soǵylǵan gol esebinen chempıondar lıgasynyń 1/8 fınalyna ótti. Bul kezeńniń jerebesi aldaǵy jyldyń 16 aqpanynda tartylyp, shymkenttik qyzdardyń qarsylasy anyqtalady. Matchtar 3-4 jáne 10-11 naýryzda ótedi. Fınal 16 mamyrda Shvetsııanyń Geteborg qalasyndaǵy «Gamla Ýllevı» stadıonynda bolady.
