FÝTBOL: Qazaqstan juldyzdary reseılik áriptesterin 3:1 esebimen utty
ALMATY. QazAqparat - Búgin otandyq estrada juldyzdarynan quralǵan «Alataý» fýtbol klýby men Reseıdiń «Starco» fýtbol klýby ashyq alańda dostyq kezdesý ótkizdi.
Otandyq top ortalyq stadıonǵa lyq tola jınalǵan qaýymnyń úmitin aqtady.
Reseılikterdiń qaqpasyn qaqyratqan eki goldyń avtory ánshi Jubanysh Jeksenuly. Al, úshinshi dopty "Araı" tobynyń ánshisi Medet saldy.
Qazaq oıynshylarynyń ishinde ánshi ári kásibı fýtbolshy Abdýlkárim Kárimov Qazaqstannyń qaqpasyna týra baǵyttalǵan 5 dopty qaıtaryp, oıynnyń favorıtine aınaldy.
Oıynǵa klýb prezıdenti - Ǵalymjan Arystanbekuly, komanda kapıtany - Muqasan Shahzadaev jáne Jubanysh Jeksenuly, Meırambek Bespaev, Sáken Maıǵazıev syndy óner ıeleri men «Rin'go», «Mysterions» toptarynyń jigitteri qatysty.
«Jalpy, juldyzdar arasyndaǵy fýtbol alǵash ret Shymkent qalasynda ótti. 2004 jyly «Juldyzdy gol» ataýymen ánshiler men ázil-syqaq teatrynyń ártisteri arasynda ótken shara jalǵasyn taýyp, dástúrge aınalyp, jyl saıyn mundaı kezdesýler elimizdiń ártúrli qalalarynda ótip turatyn boldy. Mine, sodan beri 10 jyl ótipti. Osy on jylda klýb músheleri fýtboldyń qyr-syryn meńgerip úlgerdi. Burynǵy deńgeı men qazirgi deńgeıimizdi salystyrýǵa kelmeıdi. Komandada álsiz oıynshy joq. Sebebi barlyǵymyz da teńbil dopty teýip júrip óstik. Sondyqtan da osy jolǵy dostyq kezdesýde oıynshylar jaqsy nátıje kórsetedi dep oılaımyn»,- degen edi oıyn bastalar aldynda Muqasan Shahzadaev.
Taǵy bir aıta keterlik jaıt, fýtboldan túsetin barlyq qarajat osyǵan deıin de qaıyrymdylyq maqsattarǵa jumsalǵan eken. Osy jolǵy tabys ta kómekke muqtaj jandarǵa taratylatyn boldy.
