Fýtbol: Qazaqstan jastary sońǵy oıynda jeńilip qaldy
NUR-SULTAN. QazAqparat - Búgin 21 jasqa deıingi jastar arasynda 2021 jylǵy Eýropa chempıonatyna irikteý satysynda Qazaqstan fýtbolshylary óz alańynda Farer araldaryn qabyldady, dep habarlaıdy QazAqparat tilshisi.
Bul eki quramanyń da irikteý kezeńindegi sońǵy oıyny bolatyn. Oıyn barysynda farerlik fýtbolshylar belsendi qımyl kórsetti.
Kezdesýdiń 26-mınýtynda olardyń qatarynan Stefan Radosavlevıch esep ashty. Al 50-mınýtta Petýr Knýdsen esepti ulǵaıtsa, Ionn Iohannessen 64-mınýtta mergendigimen kózge tústi.
Esep 0:3. Farerlik fýtbolshylar osylaısha belsendiligin arttyra tústi.
Osydan keıin ǵana qazaqstandyq jastar qarqynyn údetti. Oıynnyń 65-mınýtynda Ramazan Karımov gol soqsa, 81-mınýtta Oralhan Ómirtaev penaltıden esep aıyrmasyn qysqartty.
Oıynda farerlik fýtbolshylar 3:2 esebimen jeńiske jetti. Jeńilisine qaramastan Qazaqstan jastary altynshy topta tórtinshi oryndy saqtap qaldy . Al Farer araldary 9 upaımen besinshi orynda tur.
Sondaı-aq, búgin atalǵan topta Soltústik Makedonııa men Chernogorııa, Ispanııa men Izraıl quramalary kezdesedi.
