Fýtbol: Qazaqstan jastary Soltústik Makedonııamen teń tústi
NUR-SULTAN. QazAqparat - Búgin fýtboldan 21 jasqa deıingi Qazaqstan jastar quramasy 2021 jylǵy Eýropa chempıonatyna irikteý kezeńinde syrt alańda Soltústik Makedonııamen kezdesti, dep habarlaıdy QazAqparat tilshisi.
Búgingi kezdesýde qazaqstandyq fýtbolshylar syrt alańda oınaǵanyna qaramastan qarsylasyna laıyqty qarsylyq kórsetti. Alǵashqyda makedondyq fýtbolshylar kóbirek shabýyl uıymdastyrdy. Oǵan laıyqty tótep bergen qazaqstandyq jastar ózderine qarsylastar qaqpasyna gol soǵatyn múmkindikterdi izdedi.
Degenmen alań ıeleri 20-mınýtta bizdiń qaqpaǵa gol soǵyp ketti. Ony Mılan Rıstovskı óziniń enshisine jazdy. Al 75-mınýtta qazaqstandyq qurama sapynan Oralhan Ómirtaev tarazy basyn teńestirip ketti. Oıyn 1:1 esebimen teń aıaqtaldy.
Osy oıynnan keıin Qazaqstan jastary 7 upaımen ekinshi orynǵa kóterildi. Búgingi qarsylasymyz Makedonııa úsh oıynnan keıin dál osyndaı upaımen kósh basyna shyqty.
Qazaqstan jastar quramasy endigi oıynyn 2020 jyldyń 31 naýryzynda syrt alańda Ispanııa jastaryna qarsy ótkizedi. Odan keıin 3 qyrkúıekte óz alańynda Chernogorııany qabyldasa, 8 qyrkúıekte syrt alańda Izraıl jastarymen sheberlik baıqasady. Al óz alańynda 8 qazanda Soltústik Makedonııany. 13 qazanda Farer araldaryn qabyldaıdy.
Atalmysh dodanyń fınaldyq kezeńi 2021 jyldyń 13-27 maýsym aralyǵynda Vengrııa, Slovenııa memleketterinde ótkizedi. Onda barlyǵy 16 qurama baq synaıdy.
Esterińizge sala ketelik, Qazaqstan jastary altynshy topta synǵa túsedi. Buǵan deıin tórt kezdesý ótkizip úlgerdi. Aldymen 6 maýsymda Farer araldaryn 3:1, odan keıin 12 maýsymda Chernogorııany 2:1 esebimen jeńdi. Al 6 qyrkúıekte Ispanııaǵa 0:1, 10 qyrkúıekte Izraılge 1:2 esebimen jol berdi.
Foto: kff.kz
