Fýtbol: Qazaqstan jastary Eýropa birinshiliginiń irikteý kezeńin jeńispen bastady
NUR-SULTAN. QazAqparat - Fýtboldan Qazaqstannyń 21 jasqa deıingi jastar quramasy 2021 jylǵy Eýropa birinshiliginiń irikteý kezeńin jeńispen bastady. Bizdiń jastaramyz búgin syrt alańda Farer araldarynan basym tústi, dep habarlaıdy QazAqparat tilshisi.
Atalmysh kezdesý Farer araldaryndaǵy Toftır qalasynda ótti. Oıyn barysynda bizdiń jastar qatarynan 2-mınýtta Reseıdiń «Sochı» komandasynyń oıynshysy Akmal Baktııarov esep ashty. Al 68-mınýtta bizdiń quramadan Qaraǵandynyń «Shahter» komandasynyń oıynshysy Dmıtrıı Bachek esepti ústemeleı tústi. Alań ıeleri qatarynan Stefan Radosavlevıch 85-mınýtta esep aıyrmasyn qysqartty. Qorytyndy esepti 89-mınýtta «Astana» oıynshysy Vladıslav Prokopenko belgiledi. Osylaısha Qazaqstan jastary atalmysh qarsylasyn 3:1 esebimen tize búktirdi.
Endi bizdiń fýtbolshylar 10 maýsymda syrt alańda Chernogorııamen kezdesedi. Sondaı-aq, Qazaqstan jastary synǵa túsetin altynshy topta Izraıl, Ispanııa jáne Makedonııa bar.
Bul - qazaqstandyq maman Aleksandr Moskalenkonyń 21 jasqa deıingi jastar quramasy bas bapkeri qyzmetindegi tuńǵysh resmı matchy. Ol budan buryn «Astana», «Qaısar» komandalarynda bas bapkerge kómekshilik etti. Sondaı-aq, ol «Shahter-Bolat» komandasynda bas bapker boldy.
Aıta keterligi, 8 maýsym kúni ulttyq qurama syrt alańda Belgııamen kezdesedi. Oıyn Nur-Sultan ýaqytymen 00.35-te bastalady. Kezdesý QazSport telearnasynan kórsetiledi.
Foto: kff.kz
