Fýtbol: Qazaqstan jastary Chernogorııadan jeńilip qaldy
NUR-SULTAN. QazAqparat - Búgin 21 jasqa deıingi jastar arasynda 2021 jylǵy Eýropa chempıonatyna irikteý oıyndary ótti. Qazaqstan jastar quramasy óz alańynda Chernogorııany qabyldady, dep habarlaıdy QazAqparat tilshisi.
Іrikteý satysyn qazaqstandyq fýtbolshylar sátti bastaǵan edi. Aldymen syrt alańda Farer araldaryn 3:1, Chernogorııany 2:1 esebimen súrindirdi. Odan keıin óz alańynda Ispanııadan 0:1, Izraılden 1:2 esebimen jeńilip qaldy. Al besinshi kezdesýinde Soltústik Makedonııamen 1:1 esebimen teń tarqasty.
Bes oıynnan keıin jastarymyz týrnır kestesinde 7 upaımen úshinshi orynda turǵan bolatyn. Búgingi kezdesýde basym tússe jaǵdaıyn jaqsartyp alar edi. Degenmen oıyn barysy basqasha órbidi.
Ekinshi kezeńde Chernogorııa sapynan Mılýtın Osmaıch 25, 68-mınýttarda qos goldyń avtory atandy. Al 80-mınýtta qarsylas komanda qatarynan Marko Rakoıants esepti ulǵaıta tústi. 90-mınýtta Ilııa Výkotıch qorytyndy esepti belgiledi. Osylaısha Qazaqstan jastary qarsylasyna 0:4 esebimen jeńilip qaldy.
Endi Qazaqstan jastar quramasy tórt oıyn ótkizedi. Aldymen, 8 qyrkúıekte syrt alańda Izraılmen sheberlik baıqasady. 8 qazanda óz alańynda Soltústik Makedonııamen kezdesse, 13 qazanda syrt alańda Ispanııamen jasyl alańǵa shyǵady. Sońǵy oıynynda 17 qarashada Farer araldaryn qabyldaıdy.
Esterińizge sala ketelik, 21 jasqa deıingi jastar quramalary arasyndaǵy Eýropa chempıonaty 2021 jyldyń 9-26 maýsym aralyǵynda Vengrııa jáne Slovenııada ótkiziledi. Onda barlyǵy 16 qurama baq synaıdy.
