Fýtbol: Qazaqstan jastar quramasy Ispanııadan jeńildi
NUR-SULTAN. QazAqparat - Búgin fýtboldan 2021 jylǵy Eýropa birinshiligine irikteý kezeńinde kezekti oıyndar ótkizildi. Dúbirli dodada altynshy topta synǵa túsetin Qazaqstan jastary búgin elordada Ispanııany qabyldady, dep habarlaıdy QazAqparat tilshisi.
Esterińizge sala ketelik, irikteý kezeńin qazaqstandyq jastar sátti bastady. Budan syrt alańda ótken eki kezdesýde de jeńiske jetti. Aldymen Farer araldaryn 3:1 esebimen tize búktirse, odan keıin Cherongorııadan 2:1 esebimen basym tústi.
Osylaısha altynshy topta týrnır kestesinde kósh basyna shyqty.
Búgingi qarsylasymyz - Ispanııa jastary qazirge deıin eshqandaı oıyn ótkizgen joq. Qos qurama buǵan deıin eki márte sheberlik baıqasqan edi. Ekeýinde de Eýropa birinshiliginiń irikteý kezeńinde jolyqqan bolatyn. 2008 jyly 25 naýryzda bizdiń jastar syrt alańda olardan 0:5 esebimen oısyraı jeńildi. Al sol jyldyń 5 qyrkúıeginde óz alańymyzda ótken qarymta kezdesýde ıspan jastaryna 1:2 esebimen jol berdi.
Qazirgi tańda 21 jasqa deıingi Qazaqstan jastar quramasyna jergilikti maman Aleksandr Moskalenko jetekshilik jasaıdy. Oǵan Qaırat Nurdáýletov kómekshilik etip keledi.
Elimizdiń jastary búgingi kezdesýde de táp-táýir oıyn órnegin kórsetti. Alǵashqy kezeńde qos qurama tarapynan da shabýyldar uıymdastyryldy. Osyndaı sátterdiń birinde qazaqstandyq qorǵaýshylar aıyp alańynda oıyn tártibin buzdy. Tóreshi belgilegen penaltıdi 28-mınýtta ıspan fýtbolshysy Danı Olmo sheber oryndaı bildi.
Endi elimizdiń quramasy 10 qyrkúıekte óz alańynda Izraıl quramasymen kezdesedi. Sondaı-aq, búgin bizdiń topta Chernogorııa men Farer araldary oınaıdy.
Fýtboldan 21 jasqa deıingi jastar quramalary arasyndaǵy Eýropa birinshiliginiń fınaldyq kezeńi 2021 jyldyń 13-27 maýsymy aralyǵynda Vengrııa jáne Slovenııa memleketterinde ótkiziledi. Oǵan barlyǵy 16 qurama qatysa alady. Vengrııa men Slovenııa alań qojaıyndary esebinde eki joldamaǵa ıe bolyp otyr. Al toǵyz topta jeńimpaz atanǵan quramalar jarystyń fınaldyq satysyna tikeleı joldama alsa, taǵy bir joldama ekinshi oryn alǵan quramalar arasynda úzdigine beriledi. Qalǵan segiz joldamaǵa ekinshi oryn alǵan quramalar synǵa túsedi.
Búgin 2020 jylǵy Eýropa birinshiliginde Qazaqstan ulttyq quramasy syrt alańda Kıprmen kezdesedi.
