Fýtbol: Qazaqstan jastar quramasy Eýropa chempıonatynyń irikteý týrnırin jeńispen bastady
ASTANA. QazAqparat - Belgili qazaqstandyq maman Vladımır Nıkıtenko jattyqtyratyn Qazaqstan jastar quramasy 2019 jylǵy Eýropa chempıonatyna irikteý týrnırin jeńispen bastady, dep habarlaıdy «QazAqparat» HAA tilshisi.
«Qazsport» telearnasynan tikeleı efırde kórsetkenindeı, syrt alańda Lıýksembýrg quramasymen kezdesý qazaqstandyqtarǵa ońaıǵa túsken joq. 7-mınýtta Qazaqstan quramasynyń qorǵaýshysy Dáýren Májıtov óz aıyp alańynda tártip buzyp, qonaqtardyń qaqpasyna penaltı belgilendi. Muny alań ıelerinen shabýylshy Edvın Mýratovıch dál oryndaı bildi. Budan keıin Lıýksembýrg oıynshylarynyń biri soqqan dop, abyroı bolǵanda, qaqpa mańdaıshasyna tıip, asyp ketti. Al 35-mınýtta buryshtamadan berilgen dopty sátti qabyldaǵan Qazaqstan quramasynyń jartylaı qorǵaýshysy Aleksandr Sokolenko salqynqandylyq tanytyp, qaqpashydan aılasyn asyrdy.
Ekinshi taımda komanda kapıtany Dıdar Jalmuqannyń pasynan keıin ıÝrıı Pertsýh tepken dopty Lıýksembýrg qaqpashysy Valentın Rýlez qaıtara bildi. Urymtal sátterdiń birinde jartylaı qorǵaýshy Gevorg Nadjarıan Lıýksembýrg qorǵaýshysynan dopty tartyp alyp, qaqpashydan ádemi asyra bildi. Qazaqstandyqtardyń budan keıin de esepti eseleı túsýge múmkindigi boldy.
Sóıtip 2:1 esebimen jeńiske jetken Qazaqstan quramasy 13 maýsym kúni óz alańynda Chernogorııa oıynshylaryn qabyldaıdy. Toǵyzynshy topta sondaı-aq Frantsııa, Bolgarııa jáne Slovenııa quramalary oınaıdy. Bulardyń qaı-qaısysy da osal emes, Lıýksembýrgten áldeqaıda myqty.
