Fýtbol: Qazaqstan ulttyq quramasy Kabo-Verdemen joldastyq match ótkizedi
ASTANA. QazAqparat - Qazaqstan fýtbol federatsııasynyń jetekshiligi 16 maýsym kúni Almatyda taǵy bir joldastyq match ótkizý jóninde aldyn ala kelisimge keldi. Matchta bizdiń fýtbolshylardyń qarsylasy Kabo-Verde quramasy bolmaq. Bul týraly Qazaqstan fýtbol federatsııasynyń baspasóz qyzmetinen habarlandy.
Aıta keteıik, Kabo-Verde fýtbolshylary 31 naýryz kúni Portýgalııa quramasyn utqan bolatyn. Búginde Kabo-Verde quramasy FIFA reıtınginde 37-shi orynda tur.
«Qazirgi ýaqytta aldyn ala kelisim jasaldy. Tek resmı jumystar qaldy, bul halyqaralyq matchty uıymdastyrýdyń sheshýshi bóligi sanalady. Degenmen, Qazaqstan-Kabo-Verde kezdesýi 16 maýsym kúni Almatynyń Ortalyq stadıonynda ótedi dep 99 paıyzǵa aıtýǵa bolady», - deıdi Qazaqstan fýtbol federatsııasy halyqaralyq bóliminiń jetekshisi Tulpar Mansurov.
Eske sala keteıik, Almatyda Ulttyq quramanyń eki matchy josparlanǵan. 12 mamyr kúni Qazaqstan quramasy Afrıkanyń vıtse-chempıony Býrkına-Fasomen joldastyq match ótkizedi. Al, 12 maýsym kúni Eýro-2016 irikteý týrnıri aıasynda Túrkııa quramasymen oınaıdy.
