Fýtbol: Qazaqstan tuńǵysh ret Granatkın memorıalynyń jartylaı fınalynda
ASTANA. QazAqparat - Qazaqstan bozbalalary tuńǵysh ret HHІH "Granatkın memorıaly" halyqaralyq týrnıriniń jartylaı fınalyna shyqty.
Olar shırek fınalda Slovenııa jetkinshekterin tize búktirdi. Match 16 qańtar kúni Sankt-Peterbýrgte ótti.
Oıyn óte tartysty boldy. Aleksandr Kýznetsovtiń shákirtteri taǵy da qorǵanysty muqııat oınap, qarsy shabýyldarǵa ıek artty. Alda - ádettegideı, jalǵyz Erkebulan Seıdahmet. Oıyn bastalǵan bette gol soǵyp, Slovenııa jetkinshekterin seń soqqandaı kúıge túsirdi. Muhıt Jaqsylyq oń qaptalmen alǵa entelep, qarsylastarynyń qorǵanysyn buzyp-jaryp, dopty qaqpaǵa qaraı asyrdy. Al Janáli Paırýz qaqpashynyń eki qolynyń ortasynan dopty basymen qaǵyp jiberip, tor ishinde týlatty.
Budan keıin bizdiń fýtbolshylar dop jiberip almaýǵa tyrysyp, qorǵanysta óte saq oınady. Tize qosa qımyldap, Slovenııa jetkinshekteriniń birneshe shabýyldaryn toıtardy.
Qaqpashy Danııl Ýstımenkony da aıryqsha atap ótýimiz kerek. Ol Slovenııa jetkinshekteriniń birneshe qaýipti soqqylaryna tosqaýyl bola bildi. Qaǵyp ta aldy, keri toıtaryp ta otyrdy. Eń bastysy, qarsy shabýyldarymen eýropalyqtardyń qorǵanysyn pispektep, taıly-taıaǵymen alǵa qaraı lap qoıýlaryna múmkindik bergen joq. Olardyń qorǵaýshylary ustaranyń júzindeı lypyldaǵan bizdiń fýtbolshylarymyzdan kóz jazyp qalmaýǵa tyrysyp, shabýylshylaryna kóp kómek kórsete almady.
Ekinshi taımda, óte jyldam uıymdastyrǵan osyndaı qarsy shabýyldarymyzdyń birinde Slovenııa qorǵaýshysy aıyp alańyna enip bara jatqan bizdiń oıynshymyzdy ilip qalǵandaı boldy. Tóreshi senimdi túrde 11-metrlik aıyp soqqysy oryndalatyn núkteni nusqady. Al penaltıdi osy matchqa kapıtandyq taspamen shyqqan Aıdos Oral múltiksiz oryndady. Esep - 2:0.
Budan keıin Slovenııa talanttary qarqyndaryn údetip, shabýylǵa kóshti. Sońǵy sekýndarǵa deıin tizginderin tartpaı, aıyldaryn jımaı alǵa enteleýmen boldy. Biraq bizdiń qorǵaýshylarymyz da, qaqpashymyz da bul oıynda eshqandaı da óreskel qatelik jibergen joq. Jeńisti ýystarynan shyǵarǵan joq.
Sóıtip, osy týrnırdiń tarıhynda tuńǵysh ret jartylaı fınalǵa shyqty. Olar endi 18 qańtar kúni Grekııa bozbalalarymen kezdesedi.
Derekkóz: Astana fýtbol federatsııasy
