FÝTBOL: Qazaqstan Premer-Lıgasynyń 13-shi týry kezdesýleri ótti
ASTANA. QazAqparat - Qazaqstan Premer-Lıgasynyń 13-shi týry kezdesýleri ótti. «Astana» qonaqtar alańynda «Aqtóbeden» basym tússe, pavlodarlyq «Ertis» te «Atyraýdan» jeńisti julyp aldy desek te bolady. Al Almatynyń «Qaıraty» Oraldyń «Aqjaıyǵyn» áýpirimdep júrip utyp ketti.
Sonymen Premer-Lıga 13-shi týrynyń nátıjeleri mynadaı:
«Ordabasy» - «Jetisý» 0:1 (0:1)
Gol: Savıch 11 (0:1)
«Orbadasy» klýbynyń taldyqorǵandyq «Jetisýmen» kezdesýine olardyń buǵan deıin kýbogtyq -match úshin «Atyraýǵa» qarsy oıyndary biraz kúshterin alyp qoıǵan sııaqty. Este bolsa, «Ordabasy» men «Atyraý» arasyndaǵy kezdesý oıyn aıaqtalǵannan soń aıyp dobyn soǵýǵa ulasqan bolatyn. Alaıda, bul ońtústikterdiń óz alańynda kúshi basym emes qarsylasynan jeńilýge jol beretin sebep emes-ti. Jetisýlyqtar jyldam gol soqty, osydan keıin de alań qojaıyndaryna ese qaıtarýǵa ýaqyt jetkilikti edi. Biraq, «Ordabasy» mundaı múmkinshilikti esh paıdalana almady. Árıne, jetisýlyqtardyń jeńisi qýantarlyq. Kelesi týrda «Aqtóbe» komandasyn óz alańynda qabyldaıtyn taldyqorǵandyqtarǵa qalaı bolǵanda da jeńisti qoldan bermeý basty mindet sııaqty.
«Shahter» - «Tobol» 1:0 (1:0)
Gol: Baıjanov 42 (1:0)
Qaraǵandynyń «Shahteri» men Qostanaıdyń «Tobyly» arasyndaǵy oıyn tipti súreńsiz ótti desek te artyq emes. Qaýipti sátter saýsaqpen sanarlyq qana boldy. Onyń ústine eki komanda da shabýyldy údetýge asa peıil tanyta qoımady. Degemen, urymtal sátti sátti paıdalanǵan Maqsat Baıjanov qaraǵandylyqtardy alǵa shyǵardy. Aıta keterligi, dál qazir qostanaılyqtarǵa bapker aýystyratyn sát týyndap otyrǵan sekildi. Áıtpese bul komandanyń alǵashqy altylyqqa kirýge esh múmkindigi joq. Komanda basshylyǵynyń neni kútip otyrǵandyǵy túsiniksizdeý.
«Qaırat» - «Aqjaıyq»- 3:2 (1:2)
Gol: Valıýllın 3 (0:1), Islamhan, aıyp doby 15 (1:1), Hromtsov 31 (1:2), Goý 90 (2:2), Tavamba 90 (3:2)
Almatydaǵy oıyn barynsha tartysty ótti ári qaqpashy Sıdelnıkovtiń benefısine aınalyp ta kete jazdady. Kahaber Tshadadze qosalqy qaqpashynyń qaýqaryn baıqap kórgisi kelgen sııaqty. Alaıda, almatylyqtardyń qaqpasyna toǵytylǵan eki gol da Sıdelnıkovtyń qateliginen edi. Oıynnyń sońyna qaraı «Qaırat» jankúıerleri komandasynyń jeńetine senimi joǵalyp, unjyrǵylary túse bastaǵan edi. Degemen, oıynnyń 90-shy mınýtynda aldymen Goý, odan keıin ile-shala Tavamba oraldyqtardyń qaqpasynyń osal tusyn dál kózdedi.
«Oqjetpes» - «Taraz» 0:0
Alańnan qýylǵandar: Chertov 86
Kókshetaýdyń «Oqjetpesi» taǵy da upaıdan qaǵyldy. Vladımır Mýhanovtyń ujymyna jańa lep qajet sııaqty. Ásirese, shabýylshylarǵa basa mán bergen jón kórinedi. Óıtkeni, fýbol ardageri Álibek Bóleshevten ózge óndire shabýyl jasap júrgen eshkim joq. «Astana Arena» alańynda ótken kezdesýge tarazdyqtar sońǵy oıynǵa shyqqandaı tas-túıin bolyp keldi. Nátıjesinde bir upaıdy enshiledi.
«Atyraý» - «Ertis» 0:1 (0:0)
Gol: Mýrtazaev 51 (0:1)
Atyraýlyqtar Qazaqstan kýbogynda Shymkenttiń «Ordabasy» komandasyna qarsy oınap, kóp kúsh joǵaltyp aldy. Este bolsa, sol kezdesýdiń taǵdyryn penaltı serııasy sheshken edi. Sondyqtan bolar, olar bul joly qosalqy oıynshylary barynsha tyń Pavlodardyń «Ertisine» qarymdy qaýqar kórsete almady. Degenmen, buǵan qaramastan «Atyraý» komandasynyń jeńiske jetýi múmkinshiligi joǵary edi. Roman Mýrtazaev gol soqqannan keıin atyraýlyqtar Davıd Lorııany biraz qyspaqqa alyp, birneshe márte qaýipti sátter týyndatqan edi. Aıta keterligi, atyraýlyq Pshemyslav Trytko soqqan bir goldy tóreshiler baıqamaı qalǵan bolatyn. Aldaǵy ýaqytta munyń jaı-japsary tekserile jatar.
«Aqtóbe» - «Astana» 0:1 (0:0)
Gol: Maksımovıch 83 (0:1)
Bul kezdesýde aqtóbelikterdiń dál osy maýsymda beıimdelip alǵan qýlyǵy - penaltı belgileý bolmaı qaldy. Ár kezdesý saıyn 11 metrlik aıyp dobyn soǵý múmkinshiligin alýdyń jaqsy ádisin meńgerip, daǵdyǵa aınalǵandyrǵan bul komandanyń úzdik ártisteri Nıkıta Bocharov pen Kırıll Shestakov qansha tyryssa da tóreshiler olarǵa mundaı basymdyq bere qoıǵan joq. Nátıjesinde 83 mınýttaǵy Nemanıa Maksıovıchtiń jalǵyz goly astanalyqtarǵa jeńis syılady.
