Fýtbol: Qazaqstan qyzdary Iordanııamen teń tústi
ASTANA. QazAqparat - Túrkııada ótip jatqan fýtboldan «Turkish Women's Cup 2019» halyqaralyq týrnırinde Qazaqstan áıelder quramasy B tobyndaǵy ekinshi oıynyn Iordanııaǵa qarsy ótkizdi, dep habarlaıdy QazAqparat.
Iordanııa quramasy álemdik reıtıngte 52-orynda keledi. Al Azııa qurlyǵynda alǵashqy ondyqqa jaıǵasqan.
Qazaqstan men Iordanııa quramalary arasyndaǵy kezdesýde alǵash bolyp ıordanııalyq qyzdar esep ashty. Oıynnyń 13-mınýtynda Stefanı Al-Naber óz quramasyn alǵa shyǵardy. Al 31-mınýtta Qazaqstan quramasy sapynan Kamıla Qulmaǵambetova penaltıden tarazy basyn teńestirdi. Kezdesý 1:1 esebimen teń aıaqtaldy. B tobynda búgin taǵy bir kezdesý Frantsııa men Soltústik Irlandııa arasynda ótip, frantsýz qyzdary olardy 3:1 esebimen tize búktirdi.
Esterińizge sala ketelik, 27 aqpanda Qazaqstan qyzdary Frantsııadan 0:3 esebimen jeńilip qalǵan edi. Al Iordanııa Soltústik Irlandııaǵa 0:6 esebimen oısyraı jeńildi.
Eki týrdan keıin týrnır kestesinde Frantsııa quramasy 6 upaımen kósh bastap tur. Odan keıingi oryndardaǵy Soltústik Irlandnııanyń 3, Qazaqstan men Iordanııanyń bir-birden upaıy bar.
Al A tobynda ekinshi týrda Úndistan Túrkimenstandy 10:0, Rýmynııa Ózbekstandy 1:0 esebimen jeńdi.
Qazaqstan quramasy kelesi oıynyn 3 naýryz kúni Soltústik Irlandııamen ótkizedi.
