Fýtbol: Qazaqstan qyzdary Frantsııadan jeńilip qaldy
ASTANA. QazAqparat - Túrkııada fýtboldan «Turkish Women's Cup 2019» halyqaralyq týrnıri bastaldy. Búgin Qazaqstan qyzdar quramasy Frantsııamen kezdesti, dep habarlaıdy QazAqparat tilshisi.
Atalmysh kezdesýde bizdiń qyzdar 0:3 esebimen jeńilip qaldy. Frantsııa quramasy alǵashqy kezeńde qaqpamyzǵa bir gol soqsa, ekinshi kezeńde ony taǵy eki golmen ústemeleı tústi.
Eske sala keteıik, atalmysh halyqaralyq týrnır 27 aqpan men 5 naýryz aralyǵynda ótedi. Oǵan barlyǵy 8 qurama qatysyp jatyr. Qazaqstan qyzdary Frantsııa, Iordanııa jáne Soltústik Irlandııamen birge B tobyna tústi. Al A tobynda Rýmynııa, Úndistan, Túrikmenstan jáne Ózbekstan quramalary synǵa túsedi.
Halyqaralyq týrnırde 27 aqpanda barlyq qurama alǵashqy oıyndaryn ótkizdi. A tobynda Rýmynııa Túrikmenstandy - 13:0, Ózbekstan Úndistandy 1:0 esebimen jeńdi. Al B tobyndaǵy taǵy bir kezdesýde Soltústik Irlandııa Iordanııadan 6:0 esebimen basym boldy.
Qazaqstan endi 1 naýryzda Iordanııamen kezdesse, Frantsııa men Soltústik Irlandııa ózara sheberlik baıqasady. Al A tobynda dál osy kúni Túrikmenstan men Úndistan, Ózbekstan men Rýmynııa oınaıdy.
