Fýtbol: Qazaqstan qyzdar quramasynyń qarsylastary anyqtaldy
ASTANA. QazAqparat - Elimizdiń fýtboldan 19 jasqa deıingi qyzdar quramasy 2019/2020 jyldardaǵy Eýropa birinshiligi irikteý kezeńinde jetinshi topta synǵa túsetin boldy. Bizdiń quramaǵa Ispanııa, Grekııa jáne Islandııa quramalary qarsylas atandy, dep habarlaıdy QazAqparat tilshisi Qazaqstan fýtbol federatsııasyna silteme jasap.
Búgin ÝEFA ofısinde 19 jasqa deıingi qyzdar quramalary arasyndaǵy 2020 jylǵy Eýropa birinshiligi irikteý kezeńiniń jerebesi tartyldy. Eýropa birinshiligi irikteý kezeńin ótkizetin memleket pen oıyndar kestesi keıinirek anyqtalady.
Týrnır erejesine sáıkes, atalmysh birinshiliktiń elıtalyq kezeńine árbir toptan úzdik shyqqan eki qurama ıe bolady. Sondaı-aq, úshinshi oryndaǵy quramalar arasynan joǵary kórsetkishke ıe bolǵan 4 qurama solardyń qataryna qosylady. Elıtalyq kezeńniń jerebesi 2019 jyldyń 22 qarashasynda tartylady. Al oıyndar 2020 jyldyń kóktem mezgilinde ótkiziledi.
Eýropa birinshiliginiń fınaldyq kezeńine jeti qurama shyǵady. Olardyń qataryna jarysty ótkizetin memleket retinde Grýzııanyń 19 jasqa deıingi qyzdar quramasy qosylady. Fınaldyq kezeń 2020 jyldyń tamyz aıynda ótkiziledi.
Esterińizge sala ketelik, fýtboldan Ulttar lıgasynyń fınaldyq synyna túsetin quramalar tolyq anyqtalǵanyn habarlaǵan edik.
Budan buryn Ulttar lıgasynyń talaby men tártibi jóninde jazyldy.
Ulttar lıgasy fınaldyq satysynyń jerebesi ústimizdegi jyldyń 3 jeltoqsanynda tartylady. Jarys jartylaı fınal, úshinshi oryn úshin saıys jáne fınaldan turady. Sondaı-aq, 2 jeltoqsanda Irlandııa astanasy - Dýblın qalasynda 2020 jylǵy Eýropa birinshiligi irikteý kezeńiniń jerebesi tartylady.
