Fýtbol: Qazaqstan quramasynyń Ulttar lıgasyndaǵy oıyn kestesi jarııalandy
NUR-SULTAN. QazAqparat - Qazaqstan quramasynyń UEFA Ulttar lıgasy 2020/2021 jyldardaǵy kezeńindegi oıyn kestesi jarııalandy, dep habarlaıdy QazAqparat tilshisi.
Esterińizge sala ketelik, qazaqstandyq qurama S dıvızıonynyń tórtinshi tobynda synǵa túsedi. qarsylastary - Lıtva, Belarýs jáne Albanııa quramalary .
Oıyn kestesi boıynsha qazaqstandyq fýtbolshylar alǵashqy kezdesýin 4 qyrkúıekte syrt alańda Lıtvamen bastap, odan keıin 7 qyrkúıekte óz alańynda Belarýs quramasyn qabyldaıdy. Al 10 qazanda Albanııa quramasyn qabyldap, 13 qazanda syrt alańda Belarýspen kezdesedi. Qazaqstan quramasy 12 qarashada syrt alańda Albanııamen oınasa, 15 qarashada óz alańynda Lıtvamen jasyl alańǵa shyǵady.
Endi qarsylastarymyz jaıynda az-kem anyqtama bere ketelik. 2020 jyldyń 20 aqpanynda jarııalanǵan FIFA-nyń sońǵy reıtınginde Albanııa 66, Belarýs 87, Lıtva 131 orynda tur. Al Qazaqstan 118 orynda keledi.
Qazaqstandyq qurama atalmysh úsh qarsylasymen de buryn kezdesken. Fýtbolshylarymyz Albanııamen 2005 jyly álem chempıonatyna irikteý kezeńinde kezdesip. olardan 0:1, 1:2 esebimen jeńilip qaldy. Al Belarýspen 2009 jyly álem birinshiligine irikteý kezeńinde 1:5, 0:4 esebimen ese jiberip, 2011 jyly joldastyq kezdesýde 1:1 esebimen teń tústi. Al Lıtvamen 2014 jyly ótken joldastyq kezdesýde 1:1 esebine qanaǵat bildirdi.
Esterińizge sala ketelik, UEFA Ulttar lıgasy alǵash ret 2018 jyly oınaldy. Bul joly Qazaqstan quramasy D dıvızıonynda birinshi topta Grýzııa, Latvııa, Andorra quramalarymen kezdesip, óz tobynda ekinshi oryndy qanaǵat tutty. UEFA Ulttar lıgasy 2018/2019 jyldardaǵy kezeńiniń fınaldyq satysynda Portýgalııa chempıon atandy.
