Fýtbol: Qazaqstan quramasy joldastyq kezdesýde Ázirbaıjandy utty
ASTANA. QazAqparat - Túrkııada fýtboldan ótken joldastyq kezdesýde Qazaqstan ulttyq quramasy Ázirbaıjan aıaqdop sheberlerin 1:0 esebimen tize búktirdi.
«Qazsport» telearnasynan kórsetkenindeı, bul oıynda Ázirbaıjan quramasy alań ıeleri bolyp sanaldy. Soǵan qaramastan, kezdesý qazaqstandyqtardyń basymdylyǵymen ótti. 8-mınýtta Serikjan Mujyqov buryshtamadan Baýyrjan Islamhanǵa pas berse, «Qaırattyń» kapıtany ony aıyp alańyna qaraı áýeletti. Muny utymdy paıdalanǵan Maqsat Baıjanov baspen dopty qaqpaǵa súńgite saldy. Budan keıin Ulan Qonysbaevtyń gol soǵatyndaı múmkindigi boldy.
Ekinshi taımda Ázirbaıjan quramasy alǵa umtylyp baqqanymen, eshteńe bitire almady. Olarǵa keıde sheberlik jetispeı jatsa, birneshe ret Oral fýtbolynyń túlegi, qazir Reseı premer-lıgasynda kósh bastap kele jatqan komandanyń biri «Rostovtyń» namysyn qorǵap júrgen Stas Pokatılov óz qaqpasyn aman alyp qaldy. Ásirese, ol oıyn sońyna taman ázerbaıjandyqtardyń aıyp soqqysyn qaıtara bildi. Esesine qazaqstandyqtar esepti ulǵaıtyndaı múmkindikterdi múlt jiberip jatty. Áýeli Sergeı Hıjnıchenkoǵa dáldik jetispese, odan keıin Maqsat Baıjanovtyń soqqysyn Ázirbaıjan quramasynyń qaqpashysy aıaǵymen qaıtara aldy. Qosymsha mınýttarda aldymen Ǵafýrjan Súıimbaevtyń, ile-shala Alekseı Şetkınniń soqqylary qaqpa mańdaıshasynan keri qaıtty.
Sóıtip, Qazaqstan quramasy bıylǵy maýsymdaǵy alǵashqy oıynynda jeńiske jetti.
Aıta keteıik, qazaqstandyqtardy bul matchqa qazirgi kezde «Aqjaıyq» komandasynyń bas bapkeri mindetin atqaratyn Talǵat Baısýfınov bastaǵan mamandar daıyndap ákeldi. Olar shetten adam izdemeı, qazaq fýtbolynyń túlekterine kóbirek múmkindik berdi. Bul, árıne, quptarlyq jaıt.
Endi Qazaqstan ulttyq quramasy 29 naýryzda Grýzııa fýtbolshylarymen taǵy bir joldastyq kezdesý ótkizedi.
