Fýtbol: Qazaqstan quramasy Túrkııanyń ulttyq komandasynan jeńildi
TANA. 3 qyrkúıek. QazAqparat /Jasulan Amanbaıuly/ - Fýtboldan Qazaqstannyń ulttyq quramasy «Eýro-2012» chempıonatynyń irikteý týrnıri aıasynda keshe, juma kúni Ystambulda Túrkııa komandasymen kezdesip, 1:2 esebimen jeńilip qaldy.
Birinshi goldy oıynnyń 31 mınýtynda qarsylastar sapynan Býrak soqty. Alaıda, kelesi taımda Ulan Qonysbaev Túrkııa qaqpashysy Demıreldi san soqtyryp, esepti teńestirdi. Matchtyń 62 mınýtynda Qazaqstan quramasynyń qorǵaýshysy aıyp alańynda qolmen oınaǵany úshin bas tóreshi Kleman Týrpen Mokınniń qaqpasyna penaltı belgiledi. Birinshi taımda gol soqqan shabýylshy Býrak bul joly dopty qaqpaǵa túsire almady. Oıynnyń negizgi ýaqyty 1:1 esebimen aıaqtaldy. Degenmen, tóreshi qosqan qosymsha ýaqyttyń 7-mınýtynda Túrkııa quramasynyń oıynshysy Arda Turan Qazaqstan quramasynyń qaqpasyna jeńisti dop saldy.
Aıta keteıik, bul cheh mamany Mıroslav Beranek tizginin ustaǵannan keıingi bizdiń komandanyń «Eýro-2012» chempıonatynyń irikteý týrnıri aıasyndaǵy úshinshi, al jalpy toptyq týrnırdegi jetinshi oıyny boldy.
Jerlesterimiz buǵan deıin ótkizgen alty matchtyń tek bireýinde ǵana jeńiske jetken bolatyn. Atap aıtar bolsaq, Qazaqstan quramasy óz alańynda Túrkııaǵa 0:3, Belgııaǵa 0:2, Germanııaǵa 0:3 esebimen ese jiberip, Ázerbaıjandy 2:1 esebimen tize búktirse, syrt alańda Avstrııadan 0:2. Germanııadan 0:4 esebimen utylyp qalǵan bolatyn.
"Eýro-2012" chempıonatynyń irikteý týrnıri aıasynda Qazaqstan quramasy Germanııa, Túrkııa, Avstrııa, Belgııa jáne Ázerbaıjan quramalarymen birge «A» tobynda oınaýda.
