Fýtbol: Qazaqstan quramasy Tájikstanmen joldastyq kezdesý ótkizedi
Bul jóninde Qazaqstan fýtbol federatsııasy málim etti.
Atalǵan oıyn FIFA joldastyq kezdesý kúntizbesine engizilgen. Eki eldiń fýtbol salasynyń basshylary bul jóninde ortaq sheshimge keldi.
Oıyn 16 qarashada elordadaǵy «Astana Arena» stadıonynda ótedi. Matchtyń bastalýy Nur-Sultan qalasynyń ýaqytymen 19:00-ge belgilengen.
Tájikstan quramasy FIFA-nyń sońǵy reıtınginde 118 orynda tursa, Qazaqstan 120-orynǵa jaıǵasqan.
Eki qurama buǵan deıin tórt márte kezdesti. Onyń úsheýinde qazaqstandyq fýtbolshylar jeńiske jetse, bireýinde teń nátıje tirkeldi.
Eske salsaq, atalǵan kezdesýge deıin ulttyq qurama 13 qarashada álem chempıonatynyń irikteý syny aıasynda syrt alańda Frantsııamen kezdesedi.
Aıta keteıik, qazaqstandyq qurama irikteý satysynda D tobynda synǵa túsedi. Qarsylastary - Frantsııa, Ýkraına, Bosnııa jáne Gertsogovına, Fınlıandııa. Óz tobynda qazaqstandyq qurama 3 upaımen besinshi orynda keledi.