FÝTBOL: Qazaqstan quramasy syrt alańda Grýzııamen 1:1 esebimen teń oınady
ASTANA. QazAqparat - Grýzııanyń Tbılısı qalasyndaǵy Borıs Paıchadze atyndaǵy stadıonda Qazaqstan ulttyq quramasy alań ıelerimen joldastyq kezdesý ótkizdi.
Budan úsh kún buryn Ázirbaıjan quramasymen ótken kezdesýge qaraǵanda, Talǵat Baısýfınov bastaǵan qazaqstandyq mamandar bul oıynda biraz ózgerister jasady. Mysaly, Islambek Qýat, Abzal Beısebekov, Azat Nurǵalıev, Alekseı Şetkın birden alańǵa shyqty. Sondaı-aq quramaǵa kópten shaqyrtylmaǵan qaqpashy Davıd Lorııa óz sheberligin kórsetýge múmkindik aldy. Al komanda kapıtany Samat Symaqov ulttyq qurama sapyndaǵy 73-inshi kezdesýin ótkizip, bul jóninen óziniń dosy Rýslan Baltıevti qýyp jetti.
Bir aıta ketetin jaıt, Grýzııa quramasyn osyǵan deıin Almatynyń «Qaıratyn» jattyqtyrǵan slovakııalyq maman Vladımır Vaıss alyp shyqty. Sondyqtan oǵan qazaqstandyq oıynshylar jaqsy tanys bolatyn.
«Qazsport» telearnasynan tikeleı efırde kórsetkenindeı, match barysynda aldymen grýzııalyq fýtbolshylardyń basymdylyǵy baıqalyp turdy. Degenmen qazaqstandyqtar da qarap qalǵan joq. 36-mınýtta oń qaptaldan sýyrylyp shyqqan Serikjan Mujyqovtyń bergen pasyn Azat Nurǵalıev qur jibermeı, esep ashty. Alaıda eki mınýttan keıin qazaqstandyqtardyń sylbyr qımylyn paıdalanǵan Tornıke Okrıashvılı tarazy basyn teńestirip ketti. Jalpy, qorǵanysta Ǵafýrjan Súıimbaev sátti qımyldaı bildi.
Ekinshi taımda qos komanda da tyńnan oıynshylaryn qosty. Sonyń ishinde qonaqtar qaqpasyn Vladımır Plotnıkov qorǵap, ulttyq quramadaǵy tuńǵysh kezdesýin ótkizdi. Ol oıyn barysynda jekedara shyqqan grýzın shabýylshysynyń soqqan dobyn qaıtaryp, qaqpasyn aman alyp qaldy. Budan keıin komandalar qansha tyrysqanmen, esep ózgergen joq.
Eske sala keteıik, 26 naýryz kúni Talǵat Baısýfınov baptaǵan Qazaqstan quramasy Túrkııada ótken joldastyq kezdesýde Ázirbaıjandy 1:0 esebimen utqan bolatyn.
