Fýtbol: Qazaqstan quramasy Soltústik Makedonııamen joldastyq kezdesý ótkizedi
NUR-SULTAN. QazAqparat - Fýtboldan Qazaqstan quramasy 4 maýsymda Soltústik Makedonııamen joldastyq kezdesý ótkizedi, dep habarlaıdy QazAqparat tilshisi.
Bul jóninde Qazaqstan fýtbol federatsııasy málim etti.
Aıta ketýimiz kerek, qos qurama osy kezge deıin eshqandaı kezdesý ótkizbegen. Makedondyq fýtbolshylar bıyl Eýropa birinshiligi fınaldyq kezeńinde S tobynda oıyn kórsetedi. Qarsylastary - Ýkraına, Nıderlandy jáne Avstrııa quramalary. Atalǵan doda Eýropanyń 11 qalasynda bolady.
2015 jyldan bastap bul eldiń quramasyn jergilikti maman Igor Angelovskı jattyqtyrady. Qazirgi quramda Goran Pandev, Enıs Bardı jáne Ezgan Alıoskı sııaqty belgili fýtbolshylar bar.
Kezdesý atalǵan eldiń astanasy - Skope qalasyndaǵy Toshe Proeskı atyndaǵy arenada ótedi.
Esterińizge sala ketelik, qazaqstandyq quramanyń dál sol kúni Kosovomen joldastyq kezdesýi uıymdastyrylýy tıis edi. Degenmen birqatar sebepterge baılanysty ol match ótpeıtin bolyp sheshildi.
2022 jylǵy álem chempıonaty irikteý kezeńinde Soltústik Makedonııa J tobynda oınaýda. Úsh oıynnan alty upaı jınap, týrnır kestesinde alty qurama arasynda ekinshi orynda keledi. Al Qazaqstan D tobynda eki oıynnan keıin bir upaımen besinshi orynda tur.
FIFA reıtınginde Soltústik Makedonııa 62, Qazaqstan 124-orynǵa jaıǵasqan.
Aıta keterligi, 7 maýsymda Qazaqstan quramasy Maltamen joldastyq kezdesý ótkizedi.
