Fýtbol: Qazaqstan quramasy Shotlandııany jeńe ala ma
ASTANA. QazAqparat - Búgin fýtboldan 2020 jylǵy Eýropa chempıonaty irikteý kezeńindegi I tobyndaǵy alǵashqy týr oıyndary bastalady, dep habarlaıdy QazAqparat tilshisi.
Qazaqstan quramasy atalmysh topta synǵa túsedi. Qarsylastary - Belgııa, Reseı, Shotlandııa, Kıpr jáne San-Marıno quramalary. Іrikteý kezeńi 21 naýryzda bastalyp, 19 qarashada máresine jetedi. Fınaldyq kezeńniń ereksheligi, tuńǵysh ret dúbirli doda Eýropanyń birneshe memleketinde ótkiziledi. Bul shara Eýropa chempıonatynyń 60 jyldyq mereıtoıyna oraılastyrylyp otyr. 2024 jylǵy Eýropa chempıonatynyń fınaldyq kezeńi burynǵy formatta uıymdastyrylady.
Bizdiń qurama irikteý kezeńindegi alǵashqy eki oıynyn óz alańynda ótkizedi. Qazaqstan fýtbolshylary búgin elordamyzda Shotlandııany qabyldasa, 24 naýryzda Reseımen sheberlik baıqasady.
Jankúıerler Shotlandııa quramasy jaıynda jaqsy biledi. Burynǵy jyldarda olar álemdik dodalarda jıi boı kórsetip jatatyn. Alaıda sońǵy kezeńde atalmysh qurama álem jáne qurlyq chempıonaty fınaldyq kezeńine shyǵa almaı keledi. Aıtalyq, olar álem chempıonatynda 2002 jyldan beri baq synaýdan shet qalyp júrse, Eýropa úzdikteriniń qatarynda 2000 jyldan bastap boı kórsetken joq. Degenmen irikteý kezeńderinde óz tobynda joldamaǵa qol sozymda qalyp qoıyp júrdi.
Sol ketken olqylyqtyń ornyn bıyl toltyra ala ma? Ras, I tobyndaǵy qarsylastary osal emes. Budan burynǵy jyldarda álemdik dodalarda aldyńǵy qatardan kórinip júrgen Belgııa men Reseı quramalary olarǵa ońaı tıe qoımaıtyny belgili. Qaı quramanyń asyǵy alshysynan túsedi. Ony ýaqytynda baǵamdaıtyn bolamyz.
Búgingi tańda Shotlandııa quramasy sapynda kóptegen jas fýtbolshylar el namysyn qorǵaýǵa múmkindik aldy. Aıta keterligi, olardyń kópshiligi Anglııa Premer-lıasynda oıyn kórsetedi. Tumandy Albıondaǵy atalmysh dop dodasy álemde úzdik retinde baǵalandy. Sondyqtan olardyń sheberlik deńgeıin joǵary baǵalaýǵa negiz bar. Mundaı fýtbolshylar qatarynda «Lıverpýl» namysyn qorǵaıtyn Endrıý Robertson, «Blekbern Rovers» oıynshysy Charlı Malgrıý, «Aston Vılladan» Djon Maklınn, «Saýtgemptonnan» Stıýart Armstrong sekildi jigitter aldaǵy kúnderde óz quramalaryn órge súıreıdi degen senim bar.
Aıta keterligi, Qazaqstan quramasy Eýropa chempıonaty irikteý kezeńin jańa bapkermen bastaıdy. Bıyl qurama tizginin cheh mamany Mıhal Bılek ustady. Cheh mamany negizinen jastarǵa senim artatynyn málim etti. Sondyqtan búgingi kezdesýde elordalyq jankúıerler tartysty oıyn barysyn tamashalaıdy degen úmitimiz zor.
Qazaqstan men Shotlandııa quramalary búgingi kúnge deıin birde-bir márte resmı nemese joldastyq kezdesý ótkizip kórgen joq. Degenmen eki eldiń komandalary eýrokýbok oıyndarynda sheberlik baıqasqan edi. Qazaqstandyq klýbtar «Seltıkpen» birneshe márte jolyqty. Sondaı-aq, atalmysh eldiń «Aberdın» klýby da bizdiń komandamen baq synasty.
Qazaqstan men Shotlandııa quramalary arasyndaǵy kezdesý elorda ýaqytymen 21.00-de bastalady. Oıyn «QazSport» telearnasynan tikeleı efırde kórsetiledi.
