Fýtbol: Qazaqstan quramasy Ózbekstan komandasymen qashan kezdesedi
NUR-SULTAN. QazAqparat - Fýtboldan Qazaqstan quramasy Ózbekstan ókilderimen joldastyq kezdesý ótkizýdi josparlap otyr. Joldastyq kezdesý aldaǵy jyldyń naýryz aıynda ótýi múmkin, dep habarlaıdy QazAqparat tilshisi.
Búgingi tańda eki eldi fýtbol basshylyǵy arasynda tıisti kelissóz júrgizilýde. Aldyn ala kelisim boıynsha kezdesý 2020 jyldyń 26 naýryzynda ótýi tıis.
Eki qurama búgingi kúnge deıin 6 márte kezdesken. Qos qurama sońǵy ret 13 jyl buryn bir-birimen sheberlik baıqasqan. Onyń ishinde 2 oıynda ózbekstandyq qurama jeńiske jetse, bireýinde qazaqstandyq fýtbolshylar basym tústi. Úsh oıynda eki qurama teń nátıjege qanaǵat bildirdi.
1992 jyldyń 16 shildesinde ótken alǵashqy kezdesýde qazaq fýtbolshylary jeńiske jetse, sol jyldyń 14 qazanynda ekeýi 1:1 esebimen teń tarqasty. Al 1994 jyldyń 13 sáýirinde Ózbekstan quramasy 1:0 esebimen basym tússe, 1997 jyldyń 20 qazanynda taǵy da 1:1 esebine qanaǵat bildirdi. Sondaı-aq, 1997 jyldyń 25 qazanynda Ózbekstan qazaqstandyq quramany 4:0 esebimen tize búktirse, 2007 jyldyń 11 naýryzynda qos qurama taǵy da 1:1 esebimen teń tústi.
FIFA-nyń sońǵy reıtıngi boıynsha Ózbekstan 85, Qazaqstan 121 orynda tur.
foto:kff.kz