Fýtbol: Qazaqstan quramasy Moldovany jeńe ala ma
ASTANA. QazAqparat - Búgin fýtboldan Qazaqstan quramasy Túrkııada oqý-jattyǵý jıyny barysynda Moldovamen joldastyq kezdesý ótkizedi, dep habarlaıdy QazAqparat tilshisi.
Sońǵy jyldarda Moldova álemdegi álsiz quramalar qatarynda sanalady. Qańtar aıyndaǵy FIFA reıtınginde atalmysh qurama 170-orynda tur. Aıta keterligi, olar 2008 jyly atalmysh reıtıngte 37-orynǵa deıin kóterilgen bolatyn. Al Qazaqstan quramasy qazir FIFA reıtınginde 117-orynǵa jaıǵasqan. Bizdiń qurama 2016 jyly búginge deıingi eń joǵary kórsetkishi sanalatyn 83-orynda bolǵan edi.
Qos qurama buǵan deıin 4 márte sheberlik baıqasty. Olardyń barlyǵy - joldastyq kezdesý sanatynda. Bir qyzyǵy, eki qurama búgingi kúnge deıin birde-bir márte resmı kezdesý ótkizip kórmegen.
Oıyndardyń barlyǵy Túrkııanyń Antalııa qalasynda ótkizildi. 2008 jyldyń 6 aqpanynda Moldova fýtbolshylary bizdiń quramany 1:0 esebimen jeńdi. Kezdesý taǵdyryn moldovalyq Igor Býgaev 13-mınýtta soqqan jalǵyz gol sheshti. Al 2010 jyldyń 3 naýryzynda bizdiń fýtbolshylar olardan dál osy eseppen taǵy jeńilip qaldy.
Bul joly búgingi qarsylasymyz sapynan Aleksandr Epýrıaný mergendik tanytty. 2013 jyldyń 6 aqpanynda ótken kezdesýde Qazaqstan quramasy atalmysh qarsylasyn 3:1 esebimen tize búktirdi. Bul joly bizdiń qurama sapynan Vıktor Dmıtrıenko 33- mınýtta esep ashsa, 59-mınýtta Baýyrjan Jolshıev esepti ústemeleı tústi. Al 86-mınýtta Anatolıı Dorosh bir gol soǵyp ketti. Kezdesý núktesin 90-mınýtta Baýyrjan Jolshıev qoıdy. Al 2015 jyldyń 18 aqpanynda bolǵan oıyn 1:1 esebimen teń aıaqtaldy. Atalmysh kezdesýde bizdiń quramadan 48-mınýtta Alekeı Şetkın, Moldovadan 54-mınýtta Aleksandr Gatskan gol soqty.
Bıyl Qazaqstan quramasyna jańa bapker keldi. Bul qyzmetke cheh mamany Mıhal Bılek taǵaıyndaldy.
Ol búgingi oıynda negizinen jastarǵa senim artýdy josparlap otyr.
Bul oıyn fýtboldan 2020 jylǵy Eýropa birinshiliginiń irikteý kezeńi aldyndaǵy ulttyq quramanyń daıyndyǵy bolyp tabylady. Esterińizge sala ketelik, bizdiń qurama I tobynda Belgııa, Reseı, Shotlandııa, Kıpr, San-Marınomen synǵa túsedi.
Qazaqstan fýtbolshylary irikteý kezeńindegi alǵashqy oıynynda 21 naýryzda Shotlandııa quramasyn qabyldaıdy. Odan keıin 24 naýryzda Astanada Reseı quramasymen sheberlik baıqasady.
Al Moldova quramasy H tobynda baq synaıdy. Qarsylastary - Frantsııa, Islandııa, Túrkııa, Albanııa, Andorra quramalary. Moldova quramalary alǵashqy oıynynda 22 naýryzda Frantsııany qabyldasa, 25 naýryzda syrt alańda Túrkııamen jasyl alańǵa shyǵady.
Qazaqstan men Moldova quramalary arasyndaǵy kezdesý Astana ýaqytymen 20.00-de bastalady.
