Fýtbol: Qazaqstan quramasy Armenııamen joldastyq kezdesý ótkizedi
NUR-SULTAN. QazAqparat – Fýtboldan Qazaqstan quramasy Armenııamen joldastyq kezdesý ótkizedi, dep habarlaıdy QazAqparat tilshisi.
Qazaqstan fýtbol federatsııasy málim etkenindeı, aldaǵy jyldyń 23-30 naýryz kúnderi ulttyq qurama «Talǵar» bazasynda oqý-jattyǵý jıynyn ótkizedi.
Osy daıyndyq aıasynda 27 jáne 30 naýryz kúnderi eki joldastyq kezdesý ótkizý josparlanǵan. Armenııa men Qazaqstan quramalary 30 naýryzda Almatyda jasyl alańǵa shyǵady. Ekinshi qarsylas keıin anyqtalady.
Armenııa quramasyn 52 jasar maman Abraam Hashmanıan jattyqtyrady.
Bıyl márege jetken 2020 jylǵy Eýropa chempıonatynyń irikteý kezeńinde Armenııa J tobynda Italııa, Fınlıandııa, Grekııa, Bosnııa jáne Gertsegovına, Lıhtenshteın quramalarymen synǵa tústi. Qorytyndyda 10 upaı jınaǵan armıandar óz tobynda besinshi orynǵa taban tiredi.
FIFA reıtınginde Armenııa 102-inshi, Qazaqstan 118-orynda keledi.
Chehııalyq maman Mıhal Bılektiń basshylyǵymen Qazaqstan quramasy Eýropa birinshiliginiń irikteý týrnırinde I tobynda Belgııa, Reseı, Shotlandııa, Kıpr jáne San-Marınomen oınap, 10 upaımen besinshi orynǵa iligip, 2008 jylǵy osyndaı jarystaǵy nátıjeni qaıtalaǵan bolatyn.
