Fýtbol: Qazaqstan kýbogynyń alǵashqy irikteý kezeńi aıaqtaldy
NUR-SULTAN. QazAqparat - Fýtboldan Qazaqstan kýbogynyń alǵashqy irikteý kezeńi máresine jetti. Atalmysh oıyndar Túrkistan oblysy men Shymkent qalasyndaǵy stadıondarda ótti, dep habarlaıdy QazAqparat tilshisi.
Jarystyń bul satysynda komandalar 19-27 naýryz aralyǵynda ózara synǵa tústi. Oǵan qatysqan 14 klýb tórt topqa bólindi. Jarystyń atalmysh satysynda birinshi, ekinshi lıga klýbtarymen birge áýesqoı komandalar qatysty. Árbir toptan úzdik shyqqan ujymdar Qazaqstan kýbogynyń shırek fınalyna joldama aldy. Shırek fınal oıyndarynda olardyń qataryna Premer-lıga komandalary komandalary qosylady.
A tobynda «Altaı» (Semeı), «Ekibastuz» (Ekibastuz), «Qyzyljar» (Petropavl), «Rýzaevka» (Soltústik Qazaqstan oblysy), V tobynda «Arys» (Túrkistan oblysy), SDıÝSShOR №8 (Nur-Sultan), «Ońtústik akademııasy» (Shymkent), Dıdar Sydyqbektiń fýtbol ortalyǵy (Nur-Sultan) komandalary baq synady. Al S tobynda «Qyran» (Shymkent), «Igilik» (Jambyl oblysy) jáne «Aqsý» (Pavlodar oblysy), D tobynda «Aqjaıyq» (Oral), «Kaspıı» (Aqtaý) komandalary sheberlik baıqasty.
Nátıjesinde A tobynan «Altaı», V tobynan «Ońtústik akademııasy» S tobynan «Aqsý», D tobynan «Kaspıı» shırek fınalǵa shyqty.
Qazaqstan kýbogy shırek fınalynyń jerebesi 28 naýryzda tartylady. Oǵan Premer-lıgadaǵy 12 jáne alǵashqy irikteý kezeńinen súrinbeı ótken 4 komanda qatysady. Komandalar eki sebetke bólinedi. Jarystyń bul satysyndaǵy oıyndar 10 sáýirde ótkiziledi.
Qazaqstan kýbogy shırek fınalynyń jerebe tartý rásimi PFLK-TV jobasy negizinde tikeleı kórsetiledi. Ol elorda ýaqytymen 12.00-de bastalady.
