Fýtbol: Qazaqstan kýbogy 1/8 fınalynyń jerebesi tartyldy
ASTANA. QazAqparat - 7 sáýir kúni Qazaqstan Kásipqoı fýtbol lıgasynyń keńsesinde el kýbogynyń jerebesi tartylyp, 1/8 fınaldyń juptary anyqtaldy.
Uıymdastyrýshylar 16 komandany eki qorjynǵa bólgen. Birinshisine ótken jylǵy kýboktyń ıegeri, el chempıony «Astanadan» bólek, ótken jylǵy Qazaqstan chempıonatynyń qorytyndysy boıynsha týrnır kestesinde joǵary oryndardan kóringen taǵy jeti komanda ornalasqan. Olar «Qaırat», «Ertis», «Ordabasy», «Oqjetpes», «Aqtóbe», «Tobyl» jáne «Atyraý».
Ekinshi qorjynǵa byltyr týrnır kestesiniń tómengi jaǵynan oryn alǵan «Shahter», «Aqjaıyq» jáne «Tarazdan» bólek, Birinshi lıganyń jeńimpazy «Qaısar», sondaı-aq, keshe ǵana aıaqtalǵan el kýbogy elektik kezeńiniń jeńimpazdary «Maqtaaral», «Qyran», «Jetisý» jáne «Qyzyl-Jar» komandalary ornalasty.
Eki qorjyndaǵy sharlar kezek-kezek alynyp, bir sebetke salyndy da, qaısysy birinshi shyǵarylsa, sonysy 1/8-fınalda oıyndy óz alańynda ótkizetin bolyp bekitildi. Biraq, bul ereje irikteý kezeńinen ótken komandalarǵa qatysty emes. 1/8-fınaldyń oıyndaryn ol komandalar óz alańdarynda qabyldaıtyn bolyp áý basta sheshilgen.
Bul kezeńniń oıyndary 19 sáýir kúni ótedi. Esterińizge sala keteıik, bıyl Qazaqstan kýbogynyń fınaly Aqtóbe qalasynda ótedi.
Qazaqstan kýbogynyń 1/8-fınaly
19 sáýir (sársenbi) «Qyzyl-Jar» (Petropavl) - «Ordabasy» (Shymkent)
«Tobyl» (Qostanaı) - «Shahter» (Qaraǵandy)
«Maqtaaral» (Jetisaı) - «Oqjetpes» (Kókshetaý)
«Ertis» (Pavlodar) - «Qaısar» (Qyzylorda)
«Qyran» (Shymkent) - «Atyraý»
«Qaırat» (Almaty) - «Taraz»
«Aqjaıyq» (Oral) - «Aqtóbe»
«Jetisý» (Taldyqorǵan) - «Astana»
Derekkóz: Astana fýtbol federatsııasy
