Fýtbol: Qazaqstan klýbtary eýrokýbok oıyndaryna qatysýǵa sertıfıkat aldy
NUR-SULTAN. QazAqparat - Fýtboldan bıyl eýrokýbok oıyndaryna qatysatyn qazaqstandyq komandalarǵa sertıfıkat berildi, dep habarlaıdy QazAqparat tilshisi.
Esterińizge sala ketelik, bıyl Almatynyń «Qaıraty» UEFA Chempıondar lıgasynda synǵa túsedi. Al «Tobyl» (Qostanaı), «Astana» (Nur-Sultan) jáne «Shahter» (Qaraǵandy) klýbtary UEFA Konferentsııa lıgasynda jasyl alańǵa shyǵady.
«Qaırat» atalǵan týrnırde ekinshi márte baq synaýǵa múmkindik aldy. Alǵash ret almatylyqtar 2005 jyly el namysyn qorǵaǵan edi. Degenmen birinshi irikteý kezeńinde eki oıynnyń nátıjesimen Slovakııanyń «Artmedıa» klýbynan (2:0, 1:4) jeńilip, jarystan shyǵyp qaldy. Odan keıingi jyldarda toǵyz márte Eýropa lıgasynda baq synady.
Al Konferentsııa lıgasy bıyldan bastap tuńǵysh márte oınalady. Onda UEFA reıtınginde tómengi oryndarda júrgen elderdiń komandalary sheberlik baıqasady.
Aıta keterligi, qyzdar arasynda eýrokýbok oıyndaryna Shymkenttiń «BIIK-Qazyǵurt», Kókshetaýdyń «Oqjetpes» klýbtary qatysady.
