Fýtbol: Qazaqstan - Germanııa oıyny jankúıerlerine qosymsha avtobýstar qyzmet kórsetedi
ASTANA. 19 naýryz. QazAqparat - 22 naýryzda «Astana-arena» stadıonynda Qazaqstan men Germanııa arasynda fýtbol matchy ótedi.
Osyǵan oraı, qala turǵyndary men qonaqtar stadıonǵa esh qıyndyqsyz kelip-ketýi úshin qosymsha avtobýstar shyǵarylady. Bul týraly qalalyq Jolaýshylar kóligi jáne avtomobıl joldary basqarmasynan málim etti.
«Qazirgi kezde «Astana-arena» aıaldamasyna №10, 12, 27, 30, 40, 41, 43 sekildi 7 baǵdardaǵy avtobýstar toqtaıdy. Jaı kúnderi olar 00.00 saǵatqa deıin qyzmet kórsetedi. 00.00 saǵattan keıin «Astana-Arenaǵa» jınalady. Sonymen qatar olarǵa sol jaǵalaýda júretin № 18, 20, 21, 28, 30, 42 jáne 46 nómirindegi taǵy 7 marshrýt qosylady. Qoryta aıtqanda, oıyn aıaqtalarda (02.00 saǵat shamasynda) stadıonda 70-ke tarta avtobýs bolady. Oıynnan keıin osy avtobýstar jankúıerlerdi otyrǵyzyp alyp, baǵdar boıynsha qalanyń belgilengen núktesine jetkizedi», - dep túsindirdi vedomstvodan.
Basqarmadan habarlaǵandaı, tún mezgilinde de qoǵamdyq kóliktegi jol júrý quny burynǵysynsha 60 teńge kóleminde qalady. Tek aılyq jol júrý bıletteri jaramsyz bolady.
Astana qalasy JPB bastyǵynyń orynbasary Qalı Aımaǵambetovtyń aıtýynsha, fýtboldy tamashalaýǵa kelgender «Astana arena» stadıonynyń 1500 oryndyq turaǵy tolǵan jaǵdaıda, kólikterin «Alaý» muz aıdyny saraıy men «Saryarqa» respýblıkalyq velotreginiń turaqtaryna qoıýyna ruqsat etiledi.
