FÝTBOL: Qazaqstan chempıonatynyń birinshi kezeńi aıaqtaldy
ASTANA. QazAqparat - Búgin Qazaqstan premer-lıga chempıonatynyń 22-týrdaǵy oıyndary aıaqtalyp, elimizdegi dop dodasynyń birinshi kezeńi óz máresine jetti. Bul týraly egemen.kz habarlady.
Birinshi kezeńniń qorytyndysy boıynsha, «Aqtóbe» (Aqtóbe), «Qaırat» (Almaty) jáne «Astana» (Astana) komandalary týrnır kestesiniń aldyńǵy úsh ornyna jaıǵasty. «Shahter» (Qaraǵandy), «Ordabasy» (Shymkent) jáne «Qaısar» (Qyzylorda) alǵashqy altylyqqa endi.
Búgin «Aqtóbe» óz alańynda «Tarazdy» qabyldady. Alań ıeleri Robert Arzýmanıan men Marat Haırýllınniń 32 jáne 43-mınýttarda salǵan goldarymen jeńiske jetti, esep: 2:0. Al Qaraǵandydaǵy oıynda alań ıeleri men Pavlodardyń «Ertisi» 2:2 bolyp oıyndy aıaqtady. «Ertisi» úzdik altylyqqa ene almady. Semeıdiń «Spartagy» Qostanaıdyń «Tobylyn» 2:1 esebimen utqany kútpegen jańalyq boldy. Atyraýda «Qaırat» taǵy da sheberligin tanytty, 23-mınýtta Jerar Goý esep ashyp, komandasyn alǵa súıredi. Ekinshi goldy alań ıeleri sapyndaǵy Renat Abdýllın óz qaqpasyna salyp aldy. 90-mınýtta Aslan Darabaev sońǵy núkteni qoıdy. Taldyqorǵanda jergilikti «Jetisý» men «Astana» arasyndaǵy matchta esep ashylmady. Meımandar shvedtiń AIK komandasymen ótkeli turǵan qarymta kezdesýge kóbirek alańdaǵan sııaqty. Shymkentte «Ordabasy» Qyzylordanyń «Qaısaryn» 2:1 esebimen jeńdi. Alań ıeleri birinshi taımnyń úshten eki bóliginde esepti 2:0-ge jetkizdi. Gol avtorlary - Erkebulan Tuńǵyshbaev (11-mınýt) pen Dáýrenbek Tájimbetov (33-mınýt). Qonaqtar sapynan jalǵyz qarymta dopty 88-mınýtta Eljas Altynbekov qaıtardy. «Ordabasy» - «Kaısar» 2:1 (2:0)
