Fýtbol: Qazaqstan chempıonatyndaǵy eń úzdik gol anyqtaldy
NUR-SULTAN. QazAqparat – 2020 jylǵy OLIMPBET-fýtboldan Qazaqstan Chempıonatynyń úzdik goly anyqtaldy, dep habarlaıdy QazAqparat Qazaqstan kásipqoı fýtbol lıgasyna silteme jasap.
Kásipqoı lıga mamandary fýtboldan Qazaqstan Chempıonatynyń ótken maýsymdaǵy úzdik golyn anyqtaý maqsatynda arnaıy saýalnama uıymdastyrǵan bolatyn.
Oǵan sport jankúıerleri men BAQ ókilderi qatysty.
Saýalnama QKFL Vkontakte áleýmettik jelisiniń resmı tobynda ótkizildi. Jankúıerler tańdaýyna tamyz, qyrkúıek, qazan jáne qarasha aılarynda ótken saýalnama boıynsha úzdik atanǵan 4 gol usynyldy. Sharaǵa barlyǵy 1199 adam qatysty.
Saýalnama qorytyndysy boıynsha 2020 jylǵy OLIMPBET-fýtboldan Qazaqstan Chempıonatynyń eń úzdik golynyń avtory bolyp Ashat Taǵybergenniń esimi ataldy.
Qyzylordalyq fýtbolshy jetinshi týrdaǵy «Qaısar» – «Tobyl» (2:1) kezdesýinde alystan gol soqqan-dy.
Qyzylordalyq komanda oıynshysynyń golyna 570 (47,54 %) qatysýshy daýys berdi.
Aıta keteıik, Ashat Taǵybergen QR ulttyq quramasynda oınaıdy. Ol buǵan deıin de el birinshiliginde úzdik gollardyń avtory atanǵan.
