Fýtbol: Qazaqstan chempıonatynda kútpegen nátıjeler tirkeldi
ASTANA. QazAqparat - Búgin fýtboldan Qazaqstan chempıonatynyń kezekti HІІІ týrynda kútpegen nátıjeler tirkeldi, dep habarlaıdy QazAqparat tilshisi.
Týrnır kestesinde úzdik úshtikti túıindep turǵan Qostanaıdyń «Tobyly» óz alańynda kósh sońyndaǵy komandalardyń biri Petropavldyń «Qyzyljar» komandasyn qabyldap, 0:1 esebimen jeńilip qaldy. Birinshi taım sońynda Bratıslav Pýnoshevats soqqan gol «Qyzyljarǵa» jeńis syılady. Osyǵan deıingi tórt týr boıy qostanaılyqtar qarsylastaryn 1:0 esebimen tize búktirgen bolatyn. Bul joly dál sondaı eseppen utyldy.
«Tobyl» 25 upaımen úshinshi orynda qaldy. 19 upaımen tórtinshi orynda kele jatqan Shymkenttiń «Ordabasy» komandasy óz alańynda «Atyraýdy» utqanda, qostanaılyqtarǵa jaqyndaı túsetin edi. Olar da kútpegen jerden atyraýlyqtarǵa 0:2 esebimen (gol soqqandar Igor Zenkovıch pen Babatýnde Adenıdje) ese jiberdi.
Astanalyqtar Qyzylordada jergilikti «Qaısardy» 2:0 esebimen tize búktirip, 37 upaımen burynǵysha kósh bastap keledi. Bul oıynda Patrık Tvýması mergendigimen kózge túsip, bıylǵy chempıonattaǵy segizinshi golyn soqty. Sóıtip ol eskertýiniń kóptiginen osy týrǵa qatyspaǵan «Aqjaıyqtyń» surmergeni, ýkraınalyq Aderınsola Habıb Eseolany qýyp jetti. Elordalyqtardan Serikjan Mýjıkov ekinshi goldyń avtory atandy.
Eń tartysty oıyn Almatyda ótti. «Aqtóbeni» qabyldaǵan «Qaırat» Baýyrjan Islamhannyń dál soqqysy arqasynda 3-mınýtta esep ashqanymen, Markos Pızellıdiń qos doby qonaqtardy alǵa shyǵardy. Tek 77-mınýtta Ivo Ilıchevıch pen 89-mınýtta Ýgo Sılveıranyń soqqan goldary almatylyqtarǵa jeńis áperip, taǵy bir kútpegen nátıjeniń tirkelýine múmkindik bermedi. 32 upaıy bar «Qaırat» «Astanadan» bes upaıǵa qalyp keledi, biraq olardyń eki oıyny kem.
Pavlodarda jergilikti «Ertis» 2:0 esebimen (gol avtorlary - Mılosh Stamenkovıch pen Fýad Salamı) «Aqjaıyqtyń» meselin qaıyryp, 17 upaımen besinshi orynǵa kóterildi. Dál sondaı upaıy bar oraldyqtar altynshy satyǵa syrǵydy.
Taldyqorǵanda Qaraǵandynyń «Shahterin» 1:0 esebimen (mergendik tanytqan Edgar Malakıan) «Jetisý» 14 upaımen jetinshi orynǵa shyqty.
Endi Qazaqstan ulttyq quramasynyń óner kórsetýine baılanysty birinshilikte eki aptadaı úzilis bolady. 17 maýsym kúngi HIV týrda «Qaısar» - «Jetisý», «Astana» - «Ertis», «Aqjaıyq» - «Qaırat», «Aqtóbe» - «Ordabasy», «Atyraý» - «Tobyl», «Qyzyljar» - «Shahter» oıyndary ótedi.
