Fýtbol: Qazaqstan búgin Soltústik Makedonııamen joldastyq kezdesý ótkizedi
NUR-SULTAN. QazAqparat - Búgin, 4 maýsymda fýtboldan Qazaqstan quramasy Soltústik Makedonııamen joldastyq kezdesý ótkizedi, dep habarlaıdy QazAqparat tilshisi.
Oıyn elorda ýaqytymen 22.00-de bastalyp, Qazsport telearnasynan tikeleı efırde kórsetiledi.
Aıta keteıik, qazaqstandyq quramaǵa Soltústik Makedonııa Eýropada kezdesip otyrǵan 39-shy qarsylasy atanbaq. Ázirge qazaqstandyqtar olardan ózge Bosnııa men Gertsegovına, Gıbraltar, Izraıl, Ispanııa, Italııa, Kosovo, Lıhtenshteın, Lıýksembýrg, Norvegııa, Soltústik Irlandııa, Slovakııa, Slovenııa, Ýels jáne Shveıtsarııa quramalarymen kúsh synasyp kórgen joq.
Qazaqstandyq fýtbolshylardyń búgingi qarsylasy álemde joǵary jetistigimen maqtana almaıdy. Eýropa qurlyǵynda da ortanqol quramalar qatarynda sanalady. Búgingi kúnge deıin álem chempıonaty irikteý kezeńinen árige asa alǵan joq. Al 2020 jylǵy Eýropa chempıonaty fınaldyq satysyna joldama aldy. Іrikteý kezeńinde G tobynda synǵa túsken makedondyqtar pleı-off satysynda Kosovo (2:1) men Grýzııany (1:0) orta jolda qaldyryp, bedeldi básekedegi úzdikter qataryna qosyldy.
2022 jylǵy Álem chempıonaty irikteý satysy týrnır kestesindegi jaǵdaıy jaman emes. J tobynda synǵa túsip júrgen qurama úsh oıynnan eki márte jeńiske jetip, bireýinde qarsylasyna ese jiberdi. Týrnır kestesinde alty upaımen ekinshi orynda tur. Olar azýly Germanııa quramasyn syrt alańda 2:1 esebimen tize búktirse, óz alańynda Lıhtenshteındi 5:0 esebimen oısyrata jeńdi. Al Rýmynııadan syrt alańda 2:3 esebimen jeńilip qaldy.
Al Qazaqstan quramasy 2022 jylǵy álem chempıonaty irikteý satysynda D tobynda bir upaımen besinshi orynda tur. Olar Frantsııadan óz alańynda 0:2 esebimen jeńilse , Ýkraınamen 1:1 esebimen teń tústi.
FIFA-nyń jańartylǵan reıtıngisinde Soltústik Makedonııa 62, Qazaqstan 124-orynda tur.
Soltústik Makedonııa quramynda álemniń belgili klýbtarynda dop teýip júrgen fýtbolshylar bar. Atap aıtqanda, olardyń qatarynda Italııanyń «Napolı» klýbynda oınaıtyn Elıf Elmas, «Djenoa» fýtbolshysy Goran Pandev, «Lechche» komandasynyń jartylaı qorǵaýshysy Boban Nıkolovtar bar.
