Fýtbol: Qazaqstan-Bolgarııa 1:2
ASTANA. 5 maýsym. QazAqparat - Keshe fýtboldan Qazaqstan quramasy óz alańynda Bolgarııany qabyldap, utylyp qaldy.
Oıynnyń basy shıelenisti bastaldy. Qos komanda da jyldam gol salý maqsatynda bir-biriniń aıyp alańyna lap qoıdy. Qonaqtar sát saıyn oıyndaǵy ústemdikti óz qoldaryna aldy. Birinshi taımnyń orta tusynda Bolgarııa Sıdelnıkov qorǵaǵan qaqpadan sańylaý tapty. Biraq bul gol offsaıdtan soǵylyp, eseptelmedi. Birinshi taım boıy eki komanda alma-kezek soqqylarmen almasqanymen, esep ashylmady.
«Alaman» ulttyq sport portalynyń habarlaýynsha, ekinshi taım bastalǵanda Beranek alańǵa Sıdelnıkovtyń ornyna Mokındi shyǵaryp, Nurǵalıevti Shomkoǵa, Hıjnıchenkony Grıdınge almastyrdy. Oıynnyń 57-mınýtynda Georgı Ilıev aıyp soqqysyn tamasha oryndap, esepti ashty. Arada eki mınýt ótpeı jatyp, Ivanov esepti eseledi. Tablodaǵy esep 0:2-ge jetkende cheh mamany shabýyl shebin údetpek bolyp, alańǵa «Qaırat» oıynshysy Nedashkovskııdi shyǵardy. Ol bapker senimin aqtady. «Qaırat» fýtbolshysynyń alǵashqy jasaǵan shabýyly qaqpa baǵanasyna tıip, keıin serpilgen. Tyń kúshin saqtaǵan oıynshy 88-mınýtta Shomkoǵa ádemi pas shyǵaryp berdi. Al bul pasty jas oıynshy tamasha paıdalanyp, quramadaǵy alǵashqy golyn saldy. Keıin tóreshi qosymsha bes mınýt qosqanymen, bizdiń jigitter esepti teńestire almady.
Qazaqstan - Bolgarııa 1:2 (0:0)
Goldar: Ilıev G. 57 (0:1), Ivanov 60 (0:2), Shomko 88 (1:2)
Qazaqstan: Sıdelnıkov (Mokın 46), Kırov, Logvınenko (Nedashkovskıı 67), Mýldarov, Gýrman, Nurdáýletov (Shahmetov 85), Qonysbaev (Shabalın 73) , Dmıtrenko, Hıjnıchenko (Grıdın 46), Nurǵalıev (Shomko 46), Korobkın
Bolgarııa: Ilıev P., Mınev V., Mınev I., Aleksandrov, Ivanov, Dıakov, Gadjev, Ilıev G. (Zlatınskıı 75), Manolev (Delev 71), Bojınov (Mıtsanskıı 55), Popov
Tóreshi: Alııar Agaev (Ázirbaıjan)
