Fýtbol: Qazaqstan-Belarýs 1:1
ASTANA. 10 aqpan. QazAqparat - Fýtboldan Qazaqstan ulttyq quramasy Antalııadaǵy oqý-jattyǵý jıyny aıasynda keshe Belarýs quramasymen joldastyq kezdesý ótkizip, 1:1 esebimen teń tústi.
Bul bizdiń komandanyń jańa bas jattyqtyrýshy cheh mamany Mıroslav Beranektiń qol astyndaǵy alǵashqy oıyny boldy. Qazaqstan fýtbol federatsııasynyń málimetinshe, goldy birinshi bolyp oıynnyń 45-mınýtynda penaltıden belarýstar soqty. Avtory - Vıacheslav Gleb. Bizdiń komandanyń tarapynan match aıaqtalar tusta, ıaǵnı kezdesýdiń 90-mınýtynda Sergeı Ostapenko mergendigimen kózge tústi. Osylaısha Qazaqstan quramasy jańa bas jatyqtyrýshynyń jetekshiligimen alǵashqy kezdesýin teń aıaqtap otyr.
Aıta keteıik, 2012 jylǵy Eýropa chempıonatynyń irikteý týrnıri aıasynda Qazaqstan Germanııa, Túrkııa, Belgııa, Avstrııa jáne Ázirbaıjan komandalarymen birge «A» tobynda synǵa túsýde. Osy irikteý týrnıri aıasynda jerlesterimiz buǵan deıin 4 oıyn ótkizip, sonyń barlyǵynda jeńilip qaldy. Qazaqstan quramasy birinshi oıynynda 2010 jyldyń 3 qyrkúıeginde elordada Túrkııany qabyldap, 0:3 esebimen utylyp qalsa, sodan keıin 6 qyrkúıekte syrt alańda 0:2 esebimen Avstrııaǵa ese jiberdi. Al, 8 qazanda bolǵan úshinshi matchta óz alańynda Belgııaǵa 0:2 esebimen utyldy, 12 qazanda Astanada ótken matchta Germanııadan, 0:3 esebimen utyldy. Osylaısha áli birde-bir upaı enshilemegen jerlesterimiz óz tobynda sońǵy orynda keledi. Bizdiń komanda iІrikteý týrnıri aıasyndaǵy kezekti oıynyn 26 naýryzda syrt alańda Germanııamen ótkizedi.
