Fýtbol: Qazaqstan áıelder quramasy Armenııany iri eseppen utty

ALMATY. KAZINFORM – Áıelder arasynda 2025 jylǵy Eýropa chempıonatynyń irikteý kezeńinde Qazaqstan quramasy Ortalyq stadıonda Armenııany oısyrata jeńdi.

Buǵan deıin syrt alańda armenııalyqtarǵa 1:2 esebimen ese jibergen qazaqstandyqtar artyǵymen qarymta qaıyrdy.

Aldymen 28-mınýtta Kamıla Qulmaǵambetovanyń buryshtamadan bergen pasynan keıin Aleksandra Býrova esep ashty. 35-mınýtta Aıda Gaıstenova úsh oıynshyny qapy qaldyryp, toǵyzdyqty dál kózdedi – 2:0. 39-mınýtta Armenııa sapyndaǵy Maral Artın esepti qysqartty.

Ekinshi taımda 57-mınýtta taǵy da buryshtamadan keıin komanda kapıtany Bıbigúl Nurysheva baspen dál soqty. Bir mınýttan soń Áselhan Turlybekova oıyn núktesin qoıdy - 4:1.

Budan keıin de qazaqstandyqtardyń gol soǵatyn múmkindikteri boldy.

Osylaısha, Qazaqstan áıelder quramasy alǵashqy jeńisine qol jetkizdi. Buǵan deıin Madııar Kembilovtiń shákirtteri óz alańynda Bolgarııadan – 0:1, syrtta Rýmynııadan – 0:1, Armenııadan 1:2 esebimen utylyp qalǵan edi.

Qazaqstan kelesi kezdesýin 12 shildede óz alańynda Rýmynııamen ótkizedi. Sodan soń 16 shildede Bolgarııadaǵy match kútip tur.