FÝTBOL: Qazaq balasy Italııa klýbynda baq synaıdy

«Italııa fýtbolynyń qaqpasy Qazaqstanǵa ashyldy. 17 jastaǵy Ádil Balǵabaev jeksenbi kúni Italııaǵa kelip, «B» serııasynda úshinshi orynǵa jaıǵasqan «Verona» klýbynda synaqtan ótedi. Dúısenbi kúni «Astana» jastar klýbynyń kapıtany, jas shabýylshy medıtsınalyq tekserýden ótip, «Verona» klýby mamandarynyń aldynda jattyǵý jasaıdy.

Balǵabaev 1995 jyly 13 shildede dúnıege kelgen. Ol óz elinde jaryq juldyzdardyń biri sanalady. 2010 jyly tamyz aıynda «Chelsı» mektebinde tájirıbeden ótip, «apta oıynshysy» ataǵyna ıe boldy. 2008 jyly jastar arasyndaǵy Qazaqstan birinshiliginde «Úzdik shabýylshy» atandy. Trofeıdi dańqty Mıshel Platını tabystaǵan edi. Sondaı-aq, jastar arasyndaǵy chempıonatta 2009 jyly «Surmergen», 2010 jyly «Eń úzdik oıynshy» ataǵyna ıe bolǵan. Balǵabaev Qazaqstannyń U17 jáne U18 quramalary sapynda oınap úlgerdi. Endi ol ózin Italııada synap kórmek», deıdi VeronaSera basylymy.

«Alaman» últtyq sport portalynyń habarlaýynsha,Ádil Balǵabaev - 1995 jyly týylǵan fýtbolshylardan quralǵan «Astana» komandasynyń kapıtany. Sheberliginiń arqasynda Qazaqstannyń jasóspirimder quramasyna shaqyrtý alyp úlgerdi. Ádil Semeı óńiriniń týmasy. Onyń fýtbolǵa qyzyǵýshylyǵy bes jasynan bastalǵan. 2007 jyly jas talant «Astana» klýbyna kelip qosyldy. Ádil ıtalııalyq jýrnalıs-terge suhbat berip te úlgeripti:

«Osyndaı múmkindiktiń týǵanyna óte qýanyshtymyn. Men árqashan úzdik oıynshy atanýǵa talpyndym jáne sol úshin aıanbaı ter tógip kelemin», deıdi jas shabýylshy. «Meniń boıymda jetistikke jetý úshin kóshbasshylyq pen tez meńgerý tárizdi qasıetter jeterlik», - deıdi ol. Balǵabaevqa Italııada baǵyn synaý úshin bar múmkindik jasalǵan».

Sáti túsip Ádildiń joly bolyp ketse, Apenın túbeginde dop tebetin qazaqstandyq tuńǵysh fýtbolshy bolmaq. «Altyn dop»-tyń ıesi Fabıo Kannavaro tárizdi fýtbol juldyzdary bar, Maradonna sekildi ańyzǵa aınalǵan tulǵalar dop tepken Italııada Alash ulany dop tepse, qýanysh emeı nemene!