Fýtbol: «Qaısardyń» quramy tolyq jasaqtalyp bitti
QYZYLORDA. QazAqparat - Qyzylordanyń «Qaısar» komandasy aldaǵy maýsymda oıyn kórsetetin quramdy tolyq jasaqtap bitti, dep habarlaıdy QazAqparat tilshisi.
Bıyl qyzylordalyq klýb quramyna Gegam Kademıan, Arman Keńesov, Stefan Denkovıch, Egor Potapov, Ýsman N’Doıe, Sergeı Karpovıch, Karolıs Laýkjıamıs, Iovan Chadjenovıch, Artem Leonov sekildi sheteldik qosyldy.
Komanda basshylyǵy taǵy jergilikti 12 fýtbolshymen kelisimge qol qoıdy. Atap aıtqanda, olardyń qatarynda Maqsat Baıjanov, Oljas Altaev, Eljas Altynbekov, Abylaıhan Tólegenov, Shoqan Abzalov, Nurymjan Salaıdyn, Órken Mahan, Eljas Sarbaı, Bekzat Qurmanbekuly, Danııar Álimjan, Aıan Qulmaǵanbetov syndy fýtbolshylar bar.
Jıyn barysynda 30-dan astam oıynshy synaqtan ótti. Olardyń arasynan sheberligi shyńdalǵan fýtbolshylar «Qaısar» quramyna qosyldy.
«Komanda jańa maýsymǵa tolyqtaı daıyn. «Qaısardyń» aldaǵy oıyndarda jeńiske jetýine úlken úles qosatyn fýtbolshylardy qatarǵa qostyq dep oılaımyn. Fýtbolshylar aldaǵy birinshilikke daıyndyq barysynda 3 oqý-jattyǵý jıynyn ótkizdi. Onyń ekeýi qalada ótse, sońǵysy Túrkııada boldy. Sońǵy jıyn barysynda Eýropa, Azııa men Afrıkanyń bedeldi klýbtarymen 9 joldastyq kezdesý ótkizildi. Sonyń 4-inde jeńiske jetip, 4-imen teń túsip, bireýinde qarsylasqa ese jiberip qoıdyq», - dedi «Qaısardyń» bas bapkeri Sultan Ábildaev.
Aıta keteıik, 12 naýryzda «Qaısar» fýtbol komandasynyń jańa fýtbolshylaryn tanystyrý rásimi ótedi. Al 14 naýryzda komanda el birinshiliginiń alǵashqy týrynda óz alańynda «Taraz» komandasyn qabyldaıdy.
