Fýtbol: «Qaısardyń» quramy 80 paıyzǵa jańaratyn boldy
QYZYLORDA. QazAqparat - Fýtboldan «Qaısar» komandasynyń quramy 80 paıyzǵa jańaratyn boldy, dep habarlaıdy QazAqparat tilshisi.
Búginde fýtbol klýby Túrkııa jerinde oqý-jattyǵý jıynyn ótkizýde. Onda 3 naýryzǵa deıin daıyndyǵyn júrgizedi.
«Komandaǵa jergilikti maman Sultan Ábildaev bas bapker bolyp taǵaıyndaldy. Oǵan Erlan Shoıtymov pen Qanat Sherimbetov kómektesedi. Ótken maýsymda óner kórsetken oıynshylardyń 80 paıyzy komandadan ketti. Túrkııada legıonerlerdi synaqtan ótkizemiz. Negizgi basymdyqty jergilikti oıynshylarǵa beremiz. Negizgi maqsat – aldaǵy bes jyldyqta tanymal oıynshylar shyǵarý», - dedi «Qaısar» FK dırektory Serik Dosmanbetov.
Komanda oblysta ótken jyldyń sońy men bıylǵy jyldyń basynda eki márte jattyǵý jıynyn ótkizdi. Jergilikti fýtbolshylardyń sheberligin baıqap kórdi. Kózge túsken 12 aıaqdopshyny bas bapker Antalııadaǵy jıynǵa shaqyrǵan. Olardyń qatarynda qaqpashy Nurymjan Salaıdyn, qorǵaýshylar - Eljas Sarbaı, Oljas Altaev, Abylaıhan Tólegenov, Danııar Álimjan, jartylaı qorǵaýshylar - Bekzat Qurmanbekuly, Aıan Qulmaǵanbetov, Dýman Nárzildaev, shabýylshylar - Shoqan Abzalov, Órken Mahan bar.
Búgingi kúnge deıin «Qaısar» Túrkııada eki joldastyq kezdesý ótkizip úlgerdi. Aldymen Makedonııanyń «Shkendııa» klýbymen 1:1 esebimen teń túsip, odan keıin Ýkraınanyń «Desnasyn» 1:0 esebimen tize búktirdi. Komanda quramynda qaqpashy Artem Leonov, qorǵaýshy Egor Potapov, Výk Mıtoshevıch, Lınas Klıýmavıchýs, jartylaı qorǵaýshy Nıkıta Bocharov, shabýylshy Stefan Denkovıch, Karolıs Laýkjıamıs syndy sheteldik oıynshylar keldi. Sondaı-aq, qazaqstandyq qorǵaýshy Ular Jaqsybaev, jartylaı qorǵaýshy Marat Shahmetov, Arman Keńesov sekildi fýtbolshylar synaqtan ótýde.
