Fýtbol: «Qaısar» jankúıerlerin Astanaǵa alyp barady
QYZYLORDA. QazAqparat - «Qaısar» fýtbol klýbynyń basshylyǵy komandanyń 31 naýryzda elordada «Astanamen» ótetin kezdesýine qyzylordalyq jankúıerlerdi alyp barýǵa arnaıy avtobýs bóletin boldy, dep habarlaıdy QazAqparat.
«Jergilikti jankúıerler jolǵa 30 naýryz kúni tańerteń shyǵady. Olar myń shaqyrymnan astam qashyqtyqta oryn tepken Astana qalasyna kelesi kúni jetedi dep kútilýde. Komanda basshylyǵy jankúıerlerdi «Astana Arena» stadıonyna tegin kirgizýge jaǵdaı jasaıdy.
Aıta ketelik, bul kezdesý 31 naýryzda Astana ýaqytymen saǵat 16.00-de bastalady», dep habarlady komandanyń baspasóz qyzmeti.
Alǵashqy eki týrda «Astana» óz alańynda Oraldyń «Aqjaıyǵyn» 3:0 esebimen tize búktirse, syrt alańda Taldyqorǵannyń «Jetisý» klýbyn 2:0 esebimen jeńdi. Týrnır kestesinde olar 6 upaımen kósh basynda keledi. Al «Qaısar» alǵashqy 2 týrda óz alańynda Aqtóbeniń «Aqtóbesinen» 0:1 esebimen jeńilip, Oraldyń «Aqjaıyǵymen» 1:1 esebimen teń oınap, nebári 1 upaıǵa qol jetkizdi. Qazir týrnır kestesinde segizinshi orynda tur.
«Qaısar» byltyrǵy birinshilikte de Almaty, Taraz, Shymkent jáne Aqtóbe qalalarynda ótken oıyndaryna óz jankúıerlerin alyp bardy. Sol úrdisti bıyl da jalǵastyrýdy kózdep otyr.
Ádilet Qańtarbaev
