Fýtbol: «Qaısar» úzdik úshtiktiń qatarynan kórinýdi maqsat etip otyr
QYZYLORDA. QazAqparat - Bıyl Qyzylordanyń «Qaısary» júldeli orynnan kórinýdi basty maqsat etip otyr. Bul komandany jergilikti jankúıerler aldynda tanystyrý sharasynda málim boldy, dep habarlaıdy QazAqparat tilshisi.
Byltyr jarty ǵasyrlyq mereıtoıyn atap ótken «Qaısar» sońǵy jyldarda jaqsy oıyn órnegimen jergilikti jankúıerlerdi qýantyp keledi. Sońǵy eki jylda komanda alǵashqy altylyqtan tómen túsip kórgen emes. 2017 jyly alǵashqy altylyqtan kórinse, byltyr úzdik bestikke taban tiredi. Endi bıyl odan da joǵary orynǵa qol sozýdy maqsat etip otyr.
Aıta keterligi, keıingi kezeńde komandanyń materıaldyq-tehnıkalyq bazasy jaqsardy. «Qaısardyń» sporttyq bazasy jańǵyrtyldy. Odan keıin qosalqy alań el ıgiligine aınaldy. Byltyr Ǵanı Muratbaev atyndaǵy ortalyq stadıondy qaıta jańǵyrtý sharalary bastalyp ketti.
Stadıon bıyl sáýir aıynda kópshilik kózaıymyna aınalady. Atalmysh sporttyq nysan halyqaralyq standart talaptaryna sáıkes jóndelýde. Jankúıerlerge arnalǵan qos trıbýna shatyrmen qamtamasyz etiledi. Alańǵa jasandy tósenish jabylady. Ózge de talaptar boıynsha jumystar júrgiziledi.
«Komanda aldyna qoıǵan maqsatty oryndap keledi. Endi olarǵa joǵary maqsat qoıyp otyrmyz. Bıyl «Qaısar» úzdik úshtikten kórinedi degen úmittemiz. Soǵan qoldaý bildiremiz. Bıyl komanda quramyna jergilikti fýtbolshylar kóptep tartyldy. Aıta keterligi, Syr óńirinen árbir lıgada bir-birden fýtbol komandalary oıyn kórsetip júr. Osynyń nátıjesinde jergilikti jastardyń mol tájirıbe jınaýyna negiz qalanyp otyr», - dedi Qyzylorda oblysynyń ákimi Qyrymbek Kósherbaev.
Syr óńirinde fýtboldy damytý baǵytynday is-sharalar aldaǵy ýaqytta jalǵasyn tabady. Bıyl 3 myń jankúıer sııatyn jabyq manej qurylysy qolǵa alynady. Qyzylorda qalasyndaǵy kóne sporttyq nysannyń biri sanalatyn «Lokomotıv» stadıony da qaıta jańǵyrady. Atalmysh ıgilikti isterdiń júzege asýyna oblys basshylyǵy erekshe qoldaý kórsetip keledi.
Jankúıerlermen júzdesý barysynda komandanyń jańa formasy kópshilikke tanystyryldy. Qyzylordalyq fýtbolshylar bıylǵy dop dodasynda aq jáne qyzyl tústi jeıdemen oıyn kórsetetin bolady.
Esterińizge sala ketelik, «Qaısar» alǵashqy týrda óz alańynda «Atyraý» komandasyn qabyldaıdy. Kezdesý 10 naýryz kúni ótkiziledi.
Budan buryn «Qaısardyń» quramyna jańa oıynshy qosylǵanyn habarlaǵan edik.
