Fýtbol: «Qaısar» Qazaqstan kýbogynyń ıegeri atandy
NUR-SULTAN. QazAqparat - Búgin elordada fýtboldan Qazaqstan kýbogynyń fınaly ótti, dep habarlaıdy QazAqparat tilshisi.
Fınaldyq kezeńde Qyzylordanyń «Qaısar» jáne «Atyraý» komandalary kezdesti. Eki komanda da bıyl kýbok oıyndarynda sátti oıyn kórsetti. Jarystyń úsh satysynan irkilmeı ótti.
Búgingi kezdesýde eki klýbtyń da gol soǵatyn múmindikteri boldy. Birinshi kezeńde mundaı múmkindikterdi eki komanda da tıimdi paıdalana alǵan joq.
Ekinshi kezeńde, 67-mınýtta, atyraýlyq Petr Gjelchak óz komandasyn alǵa shyǵarǵan edi. Budan keıin kóp uzamaı «Qaısardyń» kapıtany Ashat Taǵybergen alańnan qýyldy. On fýtbolshymen oınaǵanyna qaramastan 88-mınýtta qyzylordalyq komanda sapynan Igor Zenkovıch tarazy basyn teńestirdi. Budan keıin qosymsha taǵy eki kezeń qosyldy. Bul kezeńde qyzylordalyq Dýman Nárzildaev 122-mınýtta óz komandasyna jeńis syılady. Osylaısha «Qaısar» qarsylasyn 2:1 esebimen jeńdi. Nátıjesinde bıylǵy Qazaqstan kýbogynyń ıegeri atandy.
Qyzylordanyń «Qaısary» syrt alańda 1/8 fınalda «Ońtústik akademııasyn», shırek fınalda Pavlodardyń «Ertisin» jeńip ketti. Qyzylordalyq fýtbolshylar jartylaı fınalda Qostanaıdyń «Tobyl» komandasyn súrindirdi.
«Qaısar» komandasy 1999 jyly kýbokqa ıe bolyp, ol joly Óskemenniń «Vostogynan» 2:1 esebimen basym tústi. 1998 jyly fınalǵa deıin jetse, 2007 jyly jartylaı fınalda baq synady.
«Atyraý» 1/8 fınalda Taldyqorǵannyń «Jetisý» klýbyn qapy qaldyrdy. Odan keıin shırek fınalda Semeıdiń «Altaıyn» oıyn sońyndaǵy penaltı tebýde artta qaldyrdy. Jartylaı fınalda atyraýlyqtar «Ordabasy» komandasyn jeńip ketti.
«Atyraý» 2009 jyly kýbok ıegeri atandy. Sol joly Qaraǵandynyń «Shahterin» 1:0 esebimen jeńgen bolatyn. Sońǵy eki jylda fınalǵa deıin jetti. Sondaı-aq, 2001, 2004 jáne 2005 jyldarda jartylaı fınalǵa shyǵa aldy.
