Fýtbol: «Qaırattyń» oqý-jattyǵý jıyny kezindegi qarsylastary belgili boldy
NUR-SULTAN. QazAqparat – Almatylyq «Qaırattyń» aldaǵy oqý-jattyǵý jıyny kezindegi qarsylastary belgili boldy, dep habarlaıdy QazAqparat tilshisi.
«Qaırat» fýtbol klýbynyń baspasóz qyzmeti málim etkenindeı, almatylyqtar jańa maýsymǵa daıyndyq barysynda barlyǵy úsh oqý-jattyǵý jıynyn ótkizbekshi.
Birinshi jıyn 3-17 qańtar aralyǵynda klýbtyń bazasynda bolmaqshy. Onda jattyǵý men baqylaý oıyndaryn ótkizý úshin barlyq jaǵdaı jasalǵan.
Ekinshi jıyn Túrkııanyń Belek qalasynda 18-30 qańtar aralyǵynda ótedi. Osy kezeńde «Qaırat» tórt birdeı joldastyq kezdesý ótkizedi. Almatylyqtar Polshanyń chempıonatynda alda kele jatqan «Legııamen» eki márte jasyl alańǵa shyǵady. Alekseı Shpılevskııdiń shákirtteri sondaı-aq Kıevtiń «Dınamosymen» jáne Bolgarııanyń «Lýdogorets» komandalarymen kezdesedi.
Belekte ótetin úshinshi jıynda «Qaırat» slovenııalyq «Koper», máskeýlik «Dınamo», ýkraınalyq «Dnepr-1» jáne Reseı premer-lıgasynyń kóshbasshysy «Zenıt» (Sankt-Peterbor) klýbtarymen sheberlik baıqasady. Besinshi qarsylas keıin anyqtalady.
Aıta keteıik, budan buryn klýb basshylyǵy komandadan Qazaqstan ulttyq quramasynyń oıynshylary Baýyrjan Islamhan men Islambek Qýattyń ketetini jóninde málimdegen bolatyn. Sondaı-aq onyń aldynda Georgıı Jýkov, Marton Eppel, Sergeı Polıtevıch, Magomed Paragýlgov jáne Eldos Ahmetov syndy belgili fýtbolshylar «Qaıratpen» qosh aıtysqan edi. Bulardyń ornyn kimder basatyny ázirge belgisiz.
