Fýtbol: «Qaıratqa» Armenııa quramasynyń oıynshysy alyndy
NUR-SULTAN. QazAqparat – «Qaırat» fýtbol klýby Armenııa quramasynyń jartylaı qorǵaýshysy Kamo Oganesıanmen kelisimshartqa qol qoıdy, dep habarlaıdy QazAqparat tilshisi.
«Qaırat» fýtbol klýby málim etkenindeı, K.Oganesıan sporttyq jolyn 2008 jyly armenııalyq «Pıýnık» klýbynyń quramynda bastady.
Kamo erevandyq komandamen birge 200-den astam oıyn ótkizip, 32 gol soqty.
2017 jyly Oganesıan Belarýstiń premer-lıgasynda óner kórsetetin «Torpedo-BelAZ» (Jodıno) klýbymen kelisimshart jasasty. Munda ol 30 matchta 4 gol soqty.
Armenııa quramasy sapynda alǵash ret 2012 jyly Kanada men Serbııamen ótken joldastyq kezdesýlerde alańǵa shyqty. Jartylaı qorǵaýshy ǵana emes, shetki qorǵaýshy retinde oıyn órnegine jan kirgize biletin K.Oganesıan ulttyq qurama jeıdesin 50 ret kıip úlgerdi.
Sońǵy eki maýsymdy taldyqorǵandyq «Jetisý» quramynda ótkizgen 27 jastaǵy armenııalyq fýtbolshy 58 kezdesýde qarsylastar qaqpasyna 6 dop engizdi, sondaı-aq 7 márte nátıjeli pas berdi.
«Qaırat» fýtbol klýbymen kelisimshart eki jyl merzimge jasalǵan.
Eske sala keteıik, budan buryn Islambek Qýattyń Reseıdiń «Orynbor» klýbyna aýysqanyn, al «Astanaǵa» tórt fýtbolshynyń qaıtyp oralǵanyn jazǵan bolatynbyz.
