Fýtbol: «Qaırat» Reseıdiń «Rýbın» klýbynan basym tústi
NUR-SULTAN. QazAqparat - Almatylyq «Qaırat» Túrkııadaǵy oqý-jattyǵý jıyny barysynda Reseıdiń «Rýbın» (Qazan) komandasynan basym tústi, dep habarlaıdy QazAqparat tilshisi.
Oıyn Túrkııanyń Belek qalasynda ótti. Almatylyq fýtbolshylar birinshi kezeńde úsh gol soqty. Aldymen 14-mınýtta Abat Aıymbetov mergendik tanytsa, serbııalyq qorǵaýshy Rade Dýgalıch 16, polshalyq jartylaı qorǵaýshy Konrad Vjesınskı 36-mınýtta esepti ústemeleı tústi.
Oǵan «Rýbın» oıynshylary ekinshi kezeńde eki golmen jaýap qaıyrdy. Olardyń qatarynan 75-mınýtta grýzın jartylaı qorǵaýshysy Zýrıko Davıtashvılı penaltıden gol soqsa, 89-mınýtta danııalyq jartylaı qorǵaýshy Olıver Abıldgor esep aıyrmayn qysqartty. Osylaısha «Qaırat» qarsylasynan 3:2 esebimen basym tústi.
«Rýbın» 2008, 2009 jyldarda Reseı chempıony atanǵan. Sondaı-aq, 2003, 2010 jyldarda qola júldeger atandy. Qazir olar óz eliniń Premer-lıgasynda qysqy úziliste 16 komanda arasynda 13 orynda tur.
Budan buryn «Qaırat» komandasy qataryna qyrǵyzstandyq fýtbolshy qosylǵan edi.
Foto: fckairat.com
