Fýtbol: «Qaırat» pen «Shahter» teń tústi
ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 4-týrynda «Qaırat» pen «Shahter» teń tústi, dep habarlaıdy QazAqparat tilshisi.
Qazirge deıin týrnır kestesindegi komandalar jaǵdaıy túrlishe edi. Alǵashqy úsh týrda eki márte jeńiske jetip, bir márte teń túsken almatylyq «Qaırat» altynshy orynda turǵan edi. Al qaraǵandylyq «Shahter» birde-bir upaıǵa ıe bola alǵan joq. Saldarynan týrnır kestesinde tómengi orynnyń birin mise tutty.
Kezdesý barysynda komandalar oıyn basynan gol soǵatyn múmkindikti izdedi. Dese de bir-biriniń qaqpasy mańynda shabýyl uıymdastyrǵanmen kózdegen nysanany dál kózdeı almaı jatty. Oıynnyń 75-mınýtynda «Shahter» oıynshysy Roher Kanıas mergendik tanytty. Al 86-mınýtynda onyń komandalas áriptesi Fransısko Kampo Mına óz qaqpasyna gol soǵyp aldy.
Osylaısha komandalar 1:1 esebine qanaǵat bildirdi.
Endi tórtinshi týrda búgin, 1 sáýirde «Aqsý» men «Maqtaral» kezdesedi.
Al 2 sáýirde «Jetisý» men «Tobyl», «Aqtóbe» men «Qyzyljar», «Atyraý» men «Oqjetpes», «Astana» men «Ordabasy» oınaıdy.
Eske salsaq, budan buryn qyzylordalyq «Qaısar» syrt alańda aqatýlyq «Kaspııden» basym tústi.
