Fýtbol: «Qaırat» pen «Astana» arasyndaǵy sýperkýbok oıynyn Reseı, Ýkraına jáne basqa elderde kórsetedi
ASTANA. QazAqparat - Bıyl fýtboldan Qazaqstandaǵy jańa maýsym 1 naýryz kúni Astanadaǵy «Astana Arena» stadıonynda el chempıony «Astana» men Qazaqstan kýbogynyń ıegeri Almatynyń «Qaıraty» arasyndaǵy sýperkýbok oıynymen ashylady.
Osyǵan oraı Qazaqstan fýtbol federatsııasy atalǵan matchtyń tek elimizde ǵana emes, Reseı, Ýkraına, birqatar Eýropa elderinde kórsetiletinin habarlady. Atap aıtqanda, qazirdiń ózinde Reseıdiń «Sport 1» jáne Ýkraınanyń SPORT telearnalarymen kelisim jasalǵan. Ýkraınalyq kanal sonymen qatar óz habaryn Moldova, Belarýs, Lıtva, Latvııa jáne Estonııaǵa taratady.
Qazaqstan fýtbol federatsııasynyń bas menedjeri Asqar Uranqaevtyń aıtýynsha, «Astana Arena» stadıonyna 30 myńnan artyq jankúıer syıa almaıdy. Sondyqtan eń aldymen qazaqstandyq «Habar» telearnasymen kórsetilim jasaýǵa kelisilgen. Sodan keıin Túrkııa, Reseı, Qytaı jáne basqa elderdiń jetekshi telekompanııalarymen kelissózder júrgizilgen. Áli barlyq qujattarǵa qol qoıyla qoıǵan joq, sondyqtan qansha elge kórsetiletinin ázir naqty aıtý qıyn. Degenmen sonyń ózinde reseılik jáne ýkraınalyq telearnalardyń kelisim berýi el fýtbolynyń kókjıegin keńeıte túseri sózsiz.
